Лукашэнка дазволіў вывозіць з Беларусі лес-кругляк

Раней дыктатар паскардзіўся, што «ў лесе мала парадку».

Беларускі дыктатар Аляксандр Лукашэнка дазволіў сёлета экспартаваць 0,9 млн кубаметраў круглай драўніны, нягледзячы на дзейную з 2018 года забарону ў пастаўцы гэтай прадукцыі на вонкавыя рынкі, паведамляе interfax.by.

Пастанова прынятая на ініцыятыву віцэ-прэм'ера Уладзіміра Дворніка і старшыні Камітэта дзяржкантролю (КДК) Леаніда Анфімава, паведаміла дзяржагенства БелТА.

«Мінлясгасам і ўрадам было прапанавана дыктатару дазволіць экспарт 900 тысяч куб.м незапатрабаванай на ўнутраным рынку драўніны. З гэтага аб'ёму 800 тысяч куб.м - драўніна, нарыхтаваная арганізацыямі Мінлясгаса, і яшчэ 100 тысяч куб.м - Кіраўніцтвам спраў Лукашэнкі. Дыктатар падтрымаў такую прапанову», - паведаміў Анфімаў пасля дакладу прэзідэнту.

Кіраўнік КДК растлумачыў, што ў Беларусі «адбылася разбалансіроўка аб'ёмаў нарыхтоўкі драўнянай сыравіны і аб'ёмаў яе перапрацоўкі». У сувязі з гэтым, незапатрабаванымі выявіліся блізу 3 млн куб.м драўніны.

Анфімаў патлумачыў сітуацыю пагаршэннем кан'юнктуры на вонкавых рынках, праз што беларускія дрэваперапрацоўчыя прадпрыемствы скарацілі аб'ёмы вытворчасці. «Паглядзелі, сапраўды аб'ектыўна склалася такое становішча, што яны не могуць павялічыць перапрацоўку. Або могуць тэхнічна павялічыць, але прадукцыя, якую яны выпускаюць з гэтай драўніны, будзе незапатрабаванай», - прызнаў кіраўнік КДК.

З ягоных слоў, блізу 2 млн куб м будзе ўсё ж дадаткова перапрацавана на беларускіх прадпрыемствах і экспартавана ў выглядзе піламатэрыялаў.

Як паведамлялася, у Беларусі з 1 студзеня 2018 года ўвайшоў у дзеянне падпісаны ў 2016 годзе ўказ дыктатара аб забароне экспарту круглых лесаматэрыялаў. Да гэтага экспарт кругляка займаў прыкладна палову валютнага прыбытку прадпрыемстваў Мінлясгасу і складаў блізу $70 млн штогод. На ацэнку Мінлясгаса, зніжэнне аб'ёмаў экспарту ў сувязі з прынятай пастановай складае блізу $30-35 млн.

Раней таксама паведамлялася, што адкладзенае ўвядзенне ў эксплуатацыю часткі магутнасцяў Светлагорскага ЦКК, які павінен стаць адным з найбуйнейшых спажыўцоў драўніны. Прадпрыемства разлічанае на выпуск да 400 тысяч тон таварнай цэлюлозы на год, яго гадавыя патрэбы ў драўніне складуць 2,4 млн куб. м. Цяпер прадпрыемства загружанае на 60% праз невыкананне абавязацельстваў падрадчыкам - кітайскай карпарацыяй CAMCE.

Нагадаем, раней Лукашэнка заявіў, што ў лесе «мала парадку».