Прэзідэнт Грузіі заклікала аб'яднаць пазіцыі з Украінай па курсе на сяброўства ў NATO
6- 20.05.2019, 19:42
- 11,932
Уладзімір Зяленскі правёў сустрэчу з прэзідэнтам Грузіі Саламэ Зурабішвілі.
Прэзідэнт Украіны Уладзімір Зяленскі сустрэўся з прэзідэнтам Грузіі Саламэ Зурабішвілі, якая прыбыла ў Кіеў на цырымонію інаўгурацыі новаабранага кіраўніка дзяржавы. Пра гэта паведамляе прэс-служба Зяленскага.
Падчас сустрэчы Зурабішвілі пажадала Зяленскаму поспехаў на пасадзе прэзідэнта Украіны. У сваю чаргу прэзідэнт Украіну распавёў пра свае прыярытэты.
«Чаму наша каманда пайшла ў палітыку? Выклік нумар адзін для нас - спыненне агню на ўсходзе, дзе штодня гінуць нашы людзі», - адзначыў Зяленскі.
Зяленскі адзначыў, што Украіна працягне паслядоўны знешнепалітычны курс, накіраваны на аднаўленне суверэнітэту і тэрытарыяльнай цэласнасці і далейшае развіццё еўрапейскай і еўраатлантычнай інтэграцыі. Таксама Зяленскі падкрэсліў, што адным з выклікаў для Украіны з'яўляецца перамога над карупцыяй.
Акрамя таго, бакі абмеркавалі напрамкі развіцця ўкраінска-грузінскіх стасункаў і выказалі ўпэўненасць у далейшым паглыбленні стратэгічнага партнёрства.
Са свайго боку прэзідэнт Грузіі заўважыла: «Усіх нас чакае яшчэ адзін выклік - выбары ў Еўрапарламент. Мы павінны аб'яднаць пазіцыі Украіны і Грузіі па курсе на еўраінтэграцыю і сяброўства ў NATO».
Таксама Зурабішвілі запрасіла Зяленскага наведаць Грузію з афіцыйным візітам.