У Кіеве прайшла інаўгурацыя Уладзіміра Зяленскага: онлайн-трансляцыя

Новы прэзідэнт Украіны зрабіў шэраг важных заяў.

Інаўгурацыя новаабранага прэзідэнта Украіны Уладзіміра Зяленскага прайшла сёння, 20 траўня ў Вярхоўнай Радзе Украіны. Цырымонія пачалася а 10: 00. Тэкставую онлайн-трансляцыю вёў liga.net.

11:05 замежныя дыпламатычныя дэлегацыі ідуць на прыём да новага прэзідэнта Украіны ў Марыінскі палац.

10:58 каля Марыінскага палаца новаму прэзідэнту Украіны прысягнулі на вернасць кіраўнік Мінабароны Сцяпан Палтарак, кіраўнік МУС Арсен Авакаў, кіраўнік Генштаба Віктар Мужэнка, камандзір Наземмных войскаў Папко, камандзір паветраных сіл Драздоў, камандзір Вайсковых марскіх сіл, дэсантна-штурмавых войскаў Забродскі, сіл спецыяльных аперацый Лунёў, кіраўнік памежнай службы Цыгікал, кіраўнік Нацпаліцыі Князеў, кіраўнік ДСНС Чачоткін, камандзір Нацгвардыі Балан.

10: 51 Зяленскі пакінуў будынак Рады і накіраваўся ў Марыінскі палац. Яго вітаюць людзі, якія сабраліся ля парламента. Яны скандуюць "Зяленскі" і "малайчына".

10:42 Зяленскі заявіў аб роспуску Вярхоўнай Рады і датэрміновых парламенцкіх выбарах ва Украіне.

"Паважаныя дэпутаты! Сёння пагулянак не будзе. Будзем працаваць. Вельмі прашу вас прыняць закон аб скасаванні дэпутацкай недатыкальнасці, закон аб крымінальным пераследзе за незаконнае ўзбагачэнне, а таксама шматпакутны Выбарчы кодэкс. І зрабіце, калі ласка, адкрытыя спісы! Таксама я прашу вас звольніць: кіраўніка СБУ, генпракурора і міністра абароны Украіны. Гэта далёка не ўсё, што вы можаце зрабіць. У вас на гэта будзе два месяцы. Я распускаю Вярхоўную Раду VIII склікання. Таксама я прашу вас звольніць: кіраўніка СБУ, генпракурора і міністра абароны Украіны", - сказаў Зяленскі дэпутатам.

10:39 Зяленскі пра краіну: "Краіна магчымасцяў - магчымасцяў хабараў і хаосу. Вось, што яны стварылі. Я вельмі прашу, каб у вашых кабінетах не было маіх партрэтаў! Прэзідэнт - не абраз. Прэзідэнт - гэта не партрэт. Павесьце туды фатаграфіі сваіх дзяцей і перад кожнай пастановай глядзіце ім у вочы".

10:37 "Наш урад разводзіць рукамі: мы нічога не можам зрабіць! Гэта не праўда. Вы можаце. Вы можаце ўзяць паперу, асадку і вызваліць свае месцы для наступных пакаленняў, а не думаць пра сваю палітычную будучыню", - кажа Зяленскі.

10:37 Зяленскі кажа аб рэформах. Адзначае: дарогі, напрыклад, рамантуюцца "толькі ў чыёйсьці фантазіі". Парламент пляскае ў ладкі.

10:36 Цяпер Зяленскі кажа пра войска, патрэбу ўзмацняць сацыяльнае забеспячэнне войска, а таксама патрэбу ўкараняць стандарты NАТО ў Украіне.

10:35 Зяленскі стала пераходзіць з украінскай мовы на расейскую. Ляшко крычыць нешта з залы. Зяленскі адказвае: "Дзякуй, што працягваеце дзяліць украінцаў, спадар Ляшко". Зяленскі нагадвае, што мы ўсе адзіныя, нягледзячы на мову, на якой гаворым.

10: 35 "Гісторыя - несправядлівая. Не мы пачалі гэтую вайну! Не мы! Але нам гэтую вайну заканчваць. "Для пачатку гэтага дыялогу. Стане вяртанне ўсіх украінскіх палонных. Наш наступны крок - вяртанне страчаных тэрыторый. І Крым, і Данбас - гэта ўкраінская зямля, дзе мы страцілі людзей", - заявіў Зяленскі.

10:32 "Мяне часта пыталіся, на што я гатовы дзеля спынення агню. Дзіўнае пытанне. А на што гатовыя вы, украінцы, дзеля жыцця сваіх блізкіх? Для таго, каб нашы героі больш не гінулі, я гатовы на ўсё. Я гатовы прымаць складаныя пастановы. Гатовы страчваць рэйтынг. Гатовы страціць сваю пасаду. Толькі б мір надышоў", - заявіў Уладзімір Зяленскі. І дадаў: "Не страчваючы нашы тэрыторыі! Ніколі!".

10:31 "Наша першая задача - спыненне агню на Данбасе". Зала парламента пляскае ў ладкі стоячы.

10:29 Прамова Зяленскага на трыбуне: "Нас 65 мільёнаў - людзей, якіх нарадзіла ўкраінская зямля. Я звяртаюся да іх. Вы патрэбныя Украіне! Прыязджайце. Прывозіце свой досвед і ментальныя каштоўнасці. Гэта дапаможа нам пачаць новую эпоху. Скептыкі скажуць - гэта немагчыма! А можа быць гэта і ёсць наша нацыянальная ідэя: аб'яднаўшыся, зрабіць немагчымае".

10:26 Еўропа пачынаецца тут, кажа прэзідэнт Украіны Уладзімір Зяленскі.

10:18 "Я, Уладзімір Зяленскі, заступаючы на гэты высокую пасаду, урачыста прысягаю на вернасць Украіне. Абавязуюся ўсімі сваімі справамі бараніць суверэнітэт і незалежнасць Украіны, клапаціцца пра дабро Айчыны і дабрабыт украінскага народа, бараніць правы і свабоды грамадзян, пільнуючыся Канстытуцыі Украіны і законаў Украіны, выконваць свае абавязкі ў інтарэсах усіх суайчыннікаў, падымаць аўтарытэт Украіны ў свеце" - Зяленскі зачытаў тэкст прысягі. Яго рука пры гэтым ляжала на Перасопніцкім Евангеллі.

10:11 Зяленскі заняў месца за трыбунай. Урачыстае пасяджэнне Вярхоўнай Рады адкрытае. Гучыць Гімн Украіны.

10:09 Увесь час, пакуль Парубій зачытваў доўгі спіс замежных гасцей, Зяленскі чакаў за дзвярыма сесійнай залы.

10:03 Прэзідэнт Пятро Парашэнка таксама прыйшоў на інаўгурацыю Зяленскага. У сесійнай зале ён сядзіць побач з іншымі прэзідэнтамі: Віктарам Юшчанкам, Леанідам Кучмам і Леанідам Краўчуком. Калі спікер Андрэй Парубій назваў Парашэнку ў ліку прысутных, некалькі дзясяткаў народных дэпутатаў усталі са сваіх месцаў і віталі яго воплескамі.

10:01 Зяленскі зайшоў у Раду. Тым часам Парубій пачаў урачыстае пасяджэнне.

На цырымоніі прысутнічаюць таксама былыя прэзідэнты Украіны - Краўчук, Кучма, Юшчанка і Парашэнка, народныя дэпутаты, кіраўнік КСУ, генпракурор, міністры.

09:58 Уладзімір Зяленскі пешшу прыйшоў да ВР, абышоўшы Марыінскі парк і прыпыніўшыся на назіральнай пляцоўцы. Яго з'яўленне выклікала ажыятаж у яго прыхільнікаў, часцей за ўсё Зяленскаму крычалі "Не падвядзі!".

09:55 Уладзімір Зяленскі ў сваім Facebook зрабіў допіс.

09:51 На інаўгурацыю Зяленскага прыбылі пяць прэзідэнтаў - Латвіі, Літвы, Эстоніі, Грузіі і Вугоршчыны. Таксама будуць прысутнічаць прэм'ер-міністр Малдовы, віцэ-прэзідэнт Турцыі і міністр энэргетыкі ЗША.

09:45 Як паведамілі ў МУС, у сталіцы сёння дзяжураць блізу 400 супрацоўнікаў ДСНС і 90 адзінак тэхнікі. Акрамя таго, каля месцаў правядзення інаўгурацыі дзяжураць 43 выратавальнікі і 6 адзінак тэхнікі.

09:39 На балконе ў парламенце знаходзіцца Філарэт разам з рэлігійнымі прадстаўнікамі.

09:37 Каля Рады і Марыінскага палаца ўкраінцы чакаюць пачатку трансляцыі цырымоніі інаўгурацыі Уладзіміра Зяленскага. На плошчы Канстытуцыі і каля Палаца ўстаноўлена два маніторы, на якіх будзе транслявацца ўрачыстае пасяджэнне Рады.

09:29 Пад купалам ВР збіраюцца народныя дэпутаты. Парламентарыі актыўна фатаграфуюцца, паклаўшы руку на Канстытуцыю. Такія сэлфі зрабілі ўжо Алена Cотнік і шэраг іншых народных дэпутатаў.

09:24 як паведамляе карэспандэнт РБК-Украіна, паглядзець інаўгурацыю Уладзіміра Зяленскага сабраліся ўжо некалькі сотняў чалавек, увесь час падыходзяць новыя людзі. Усіх прапускаюць у Марыінскі парк праз рамкі металашукальнікаў. Тэрыторыя вакол ВР і Марыінскага палаца абгароджаная. Вакол Рады і ў парку працуюць шматлікія атрады супрацоўнікаў МУС.

09:20 У зале Вярхоўнай рады працягваецца падрыхтоўка да інаўгурацыі.

09:15 На інаўгурацыю прыехалі таксама калегі Зяленскага з «Кварталу» - Яўген Кашавы, Юрый Караўчанкаў, Міка Фаталаў.

Кашавы распавёў журналістам, што ў Раду ён заходзіць не будзе і глядзець цырымонію будзе на экране пад будынкам парламента.

"Сёння ў нас свята. У яго ўсё атрымалася", - сказаў журналістам Фаталаў.

Акрамя таго, у Вярхоўную раду ўжо прыехаў Епіфаній.

09:12 Чалавек у строі святара прыйшоў падтрымаць Зяленскага. Трымае ў руках шыльду з надпісам "Вова, ты-Кабзар, уваскрос" і "Свет – наша песня". Кажа, што гэта радкі з гімна Крывога Рога.

09:06 Па гэтай дарозе Уладзімір Зяленскі пройдзе да парламента. Вакол ў парку сабралася некалькі соцень людзей, павітаць новаабранага прэзідэнта.

08:57 Пад парламентам збіраюцца журналісты і жыхары Кіева, якія хочуць паглядзець на новаабранага прэзідэнта Украіны.

08:55 На першым паверсе Вярхоўнай Рады стала ганаровая варта ў чаканні цырымоніі інаўгурацыі.

08:52 Унутр Вярхоўнай Рады журналістаў прапускаюць толькі ў кулуары трэцяга паверха. На балкон прэсы могуць трапіць толькі тры дзясяткі фатографаў, якіх абрала прэс-служба парламента. Многія журналісты міжнародных СМІ не могуць патрапіць унутр.

08:49 У Марыінскім парку ўсталявалі 10 металічных рамак. Як паведамляе карэспандэнт РБК-Украіна, пускаюць туды і журналістаў, і ўсіх грамадзян. Правяраюць на ўваходзе супрацоўнікі ўправы дзяржаўнай аховы.

08:40 Як паведамляе карэспандэнт РБК-Украіна, рух на вуліцы Грушэўскага перацяты.

Акрамя таго, а 08:35 станцыя метро Арсенальная закрытая на ўваход, пасажыры могуць толькі выходзіць.

07:30 Учора каля Вярхоўнай рады прайшла рэпетыцыя інаўгурацыі, падчас якой новаабранага прэзідэнта замяняў статыст. А ўвечары да будынку парламенту прыбыў і сам Зяленскі.