Трамп скрытыкаваў кангрэсмэна-рэспубліканца, які заклікаў да імпічмэнту прэзідэнта

Прэзідэнт ЗША назваў Джастына Амаша «абсалютна легкаважным».

Прэзідэнт ЗША Дональд Трамп у нядзелю скрытыкаваў кангрэсмэна Джастына Амаша, назваўшы яго «абсалютна легкаважным» пасля таго як заканадавец ад Мічыгана стаў першым рэспубліканцам, які заклікаў да імпічмэнту Трампа, паведамляе «Голос Америки».

Прэзідэнт ЗША заявіў, што «ніколі не быў фанатам» кангрэсмэна, які працуе ў Палаце прадстаўнікоў пяты тэрмін.

«[Ён] выступае супраць мяне і некаторых нашых вялікіх рэспубліканскіх ідэй і палітыкі выключна дзеля таго, каб ягонае імя загучала ў супярэчлівай сітуацыі», – заявіў прэзідэнт ЗША.

"Джастын - няўдаліца, які, на жаль, гуляе на карысць нашых апанентаў", – напісаў Трамп.

Туруючы шматлікім заканадаўцам-дэмакратам, Амаш заявіў, што Трамп «учыніў дзеянні, якія могуць быць падставай для імпічмэнту», спрабуючы перашкодзіць 22-месячнаму расследаванню расейскага ўмяшання на прэзідэнцкіх выбарах у ЗША ў 2016 годзе, якое вёў спецыяльны пракурор Робэрт Мюлер.

Некаторыя дэмакраты ў Палаце прадстаўнікоў заклікалі да імпічмэнту Трампа, хоць старшыня палаты Нэнсі Пэласі не дала згоды на правядзенне якіх-небудзь слуханняў аб імпічмэнце. Пры гэтым яна пакінула адкрытай такую магчымасць, улічваючы, што некалькі камітэтаў палаты праводзяць новыя расследаванні, якія тычацца бізнэсу Трампа, ягоных падаткаў і дзеянняў за час знаходжання ў Белым доме.

Трамп абяцаў, што будзе процідзейнічаць усякім спробам запатрабаваць позвай інфармацыю аб ягоных паводзінах і палітыцы адміністрацыі. Некаторыя спрэчкі, якія датычацца доступу да дакументаў Трамп і Белага дома, ужо аспрэчваюцца ў судах, і, напэўна, пачнуцца новыя разборы.

Мюлер прыйшоў да высновы, што Трамп і ягоны перадвыбарчы штаб не ўступалі ў змову з Расеяй з мэтай дапамагчы Трампу перамагчы на выбарах. У той жа час спецыяльны пракурор заявіў, што ён не можа прыйсці да пэўнага меркавання ў пытанні аб тым, ці перашкаджаў прэзідэнт правасуддзю.

Пасля генеральны пракурор Уільям Бар і ягоны намеснік Род Розэнстайн пастанавілі, што абвінавачванні ў перашкодзе правасуддзю на адрас Трампа не абгрунтаваныя.

Прачытаўшы даклад Мюлера, Амаш апублікаваў у суботу некалькі допісаў, у якіх заявіў, што Бар "наўмысна скрывіў" змест дакладу. На думку кангрэсмэна, генеральны пракурор "хацеў увесці грамадскасць у зман" што да высноў Мюлера.

«У адрозненне ад апісання Бара, даклад Мюлера зазначае, што прэзідэнт Трамп удзельнічаў у канкрэтных дзеяннях і пільнаваўся мадэлі паводзін, якая адпавядае парогавым крытэрам для імпічмэнту, – заявіў Амаш. – У рэчаіснасці ў дакладзе Мюлера падаюцца шматлікія прыклады паводзін, якія адпавядаюць усім элементам перашкоды правасуддзю, і, несумненна, усякаму чалавеку, які не з'яўляецца прэзідэнтам ЗША, было б выстаўленае абвінавачанне на падставе такіх сведчанняў».

Міністэрства юстыцыі ЗША пільнуецца даўняга прынцыпу, што дзейнаму прэзідэнту ЗША не могуць быць выстаўленыя крымінальныя абвінавачванні, але што яго можна абвінаваціць пасля таго, як ён пакіне пасаду кіраўніка дзяржавы.

"Імпічмэнт, які з’яўляецца асобнай формай абвінавачвання, нават не патрабуе абгрунтаваных падазрэнняў ва ўчыненні злачынства (напрыклад, перашкода правасуддзю), - заявіў Амаш. - Для гэтага проста трэба высветліць, што паводзіны службовай асобы былі нядбайнымі, абразлівымі, карумпаванымі або ганебнымі ў якім-небудзь іншым плане".

На думку кангрэсмэна, "мала хто з сябраў Кангрэса" прачытаў даклад Мюлера і "іхнія погляды былі сфармаваныя на падставе партыйнай прыналежнасці".

Сэнатар-рэспубліканец Міт Ромні, які час ад часу крытыкуе Трампа, заявіў CNN у нядзелю, што пазіцыя Амаша з'яўляецца "смелай заявай", але, нягледзячы на тое, што ён «устурбаваны» паводзінамі Трампа, як яны апісаныя ў дакладзе Мюлера, ён не мяркуе, што яны могуць быць падставай для імпічмэнту.

Нават калі падкантрольная дэмакратам Палата прадстаўнікоў вылучыць идэю імпічмэнту, Сэнат, у якім большасць складаюць рэспубліканцы, практычна напэўна не пагодзіцца з адхіленнем Трамп ад пасады.

"Сэнат, пэўна, да гэтага пакуль не гатовы", - заявіў Ромні.

Трамп заявіў, што, калі б Амаш «сапраўды прачытаў прадузяты даклад Мюлера, "складзены" 18-цю абуранымі дэмакратамі, якія ненавідзяць Трампа, ён убачыў бы, што ён усё ж займае цвёрдую пазіцыю ў тым, што не было ніякай змовы і, у канчатковым выніку, ніякіх перашкод».

"У кожным выпадку, як можна перашкаджаць, калі няма злачынства, і калі напраўду злачынствы учыняліся іншай стараной?"- дадаў Трамп.