Аўстрыя: датэрміновыя выбары пройдуць у верасні
- 19.05.2019, 15:32
- 5,959
Прэзідэнт краіны і канцлер Себасцьян Курц сёння правялі перамовы.
У верасні ў Аўстрыі пройдуць датэрміновыя парламенцкія выбары, выкліканыя распадам урадавай кааліцыі праз скандал і адстаўку віцэ-канцлера і кіраўніка ўльтраправай «Партыі свабоды» Хайнца-Хрысціяна Штрахе.
Пра гэта паведамляе "Европейская правда" са спасылкай на Kronen Zeitung.
Прэзідэнт Аўстрыі Аляксандр Ван дэр Бэлен і канцлер Себасцьян Курц сёння правялі перамовы аб далейшых дзеяннях і абвясцілі, што выбары адбудуцца ў верасні.
Ван дэр Бэлен сказаў, што падтрымлівае выбары ў верасні, «калі магчыма, на пачатку верасня». Але датуль Аўстрыя павінна заставацца здольнай дзейнічаць і быць надзейным партнёрам у ЕЗ. Дакладную дату выбараў назавуць пазней.
Курц заявіў, што ў найбліжэйшыя некалькі тыдняў ён правядзе шматлікія перамовы з кіраўнікамі партый, у тым ліку з новым кіраўніком «Партыі свабоды» Норбертам Хоферам.
«Павінна быць максімальная стабільнасць. Новыя выбары былі не жаданнем, а неабходнасцю», - сказаў ён.
Як паведамлялася, у пятніцу нямецкія выданні Süddeutsche Zeitung і Spiegel апублікавалі відэазапісы сустрэчы, якая адбылася ў ліпені 2017 года на Ібіцы. Паводле гэтых запісаў, віцэ-канцлер Аўстрыі, кіраўнік ультраправай «Партыі свабоды» Штрахе сустракаўся з расейкай Аленай Макаравай, пляменніцай алігарха з атачэння Пуціна. Яна нібыта планавала інвеставаць не зусім легальныя сродкі ў Аўстрыі.
У суботу віцэ-канцлер прызнаў сапраўднасць запісаў і падаў у адстаўку, а свае дзеянні назваў «п'янай гісторыяй».