«Звярніце ўвагу, крыжы ў Курапатах не проста зносілі - на іх накідвалі зашмаргі»
12- 15.04.2019, 14:47
- 19,734
Беларускія ўлады наважылі змагацца з Богам.
4 красавіка ўлады знішчылі блізу 100 крыжоў, якія былі ўсталяваныя па перыметры народнага мемарыялу ў Курапатах, а ў суботу, 13 красавіка, яшчэ 50.
У грамадстве гэта выклікала шок, неразуменне і выбух абурэння. Дзеянні ўладаў для віцебскай «Весны» ацаніў віцебскі актывіст Хрыстафор Жаляпаў:
«На мой погляд, 4 красавіка хрыстапрадаўцы ў Курапатах чарговым разам укрыжавалі Хрыста. Звярніце ўвагу, крыжы не проста зносілі - на іх накідвалі зашмаргі, нібы вешалі. Яны думалі, што сваімі дзеяннямі змагаліся з апазіцыяй або з тымі, хто ствараў гэты мемарыял. Не - яны змагаліся з Богам! Таму дзеянні ўладаў не трэба расцэньваць як неразумныя: гэта блюзнерства і здрада Хрысту. І адказваць яны будуць не перад намі - перад Богам.
У Курапатах не проста крыжы - пад тымі крыжамі ляжаць у тым ліку і хрысціянскія святары, і праваслаўныя вернікі, якіх савецкая ўлада пазбавіла жыцця.
Хутка Радаўніца. Я мяркую, што і праваслаўныя, і каталікі абавязаныя ў гэты дзень прыйсці ў Курапаты, пакаяцца за зробленае блюзнерства і ўшанаваць памяць бязвінна забітых...
Нагадаем, партыя «Народная Грамада», якая ўваходзіць у Беларускі Нацыянальны Кангрэс, заклікала да новага малебну «Вызвалі нас ад лукавага» 15 красавіка а 18.00 каля адміністрацыі Лукашэнкі (Менск, вуліца Карла Маркса, 38).
4 красавіка ўлады знішчылі крыжы па перыметры Курапатаў.
Актывісты паведамляюць, што было знесена і вывезена блізу 100 крыжоў.
1 сакавіка на прэс-канферэнцыі Лукашэнка выказаў незадаволенасць крыжамі вакол Курапатаў, якія бачныя з дарогі.
На заклік аднаго з лідараў Беларускага Нацыянальнага Кангрэсу Мікалая Статкевіча ў цэнтры Менску адбыўся малебен, у якім узялі ўдзел блізу 1000 чалавек.
Заклік падтрымаў сустаршыня БХД Павел Севярынец.
12 красавіка ўлады зноў знішчылі 50 крыжоў па перыметры Курапатаў.