Трамп назваў сябе найлепшым сябрам Ізраіля сярод прэзідэнтаў ЗША

Палітык выступіў на Нацыянальным саміце ізраільска-амерыканскай рады ў Фларыдзе.

Прэзідэнт ЗША Дональд Трамп мяркуе, што ў Ізраіля ніколі не было лепшага сябра ў Белым доме, чым ён. Пра гэта прэзідэнт ЗША заявіў падчас Нацыянальнага саміту ізраільска-амерыканскай рады ў Фларыдзе, піша Associated Press (пераклад – РБК).

Сярод іншага ён зазначыў, што іншыя прэзідэнты ЗША толькі выказваліся з нагоды прызнання Ерусаліма сталіцай Ізраіля. Пры Трампу Вашынгтон афіцыйна зрабіў гэта і перанёс туды амбасаду з Тэль-Авіва.

«На маю думку, яны [мінулыя прэзідэнты] ніколі не збіраліся гэтага рабіць», – сказаў Трамп. «Але ў адрозненне ад іншых прэзідэнтаў, я стрымаў свае абяцанні», – дадаў ён.

У якасці доказу свайго сяброўскага стаўлення Трамп таксама нагадаў пра прызнанне суверэнітэту Ізраіля над Галанскімі вышынямі.

Таксама Трамп заклікаў габрэйскае насельніцтва ЗША «больш любіць Ізраіль».

Вашынгтон афіцыйна прызнаў Ерусалім сталіцай Ізраіля ў снежні 2017 года і пачаў працэдуру пераносу сваёй амбасады. Пасля гэтага прыкладу за ЗША рушылі Філіпіны, Чэхія, Гватэмала, Парагвай і Аўстралія.

Галанскія вышыні Трамп прызнаў ізраільскімі ў сакавіку 2019 года. Да 1967 года блізу 1800 кв. км тэрыторыі Галанскіх вышыняў належалі Сірыі, а пасля шасцідзённага вайны іх стаў кантраляваць Ізраіль.