У Беларусі зноў падлічылі страты ад падатковага манеўру РФ

Эксперт назваў суму напярэдадні перамоваў Румаса і Мядзведзева.

Дэфіцыт актуальнага рахунку плацёжнага балансу Беларусі ў 2019–2024 гадах вырасце на $ 9,25 млрд, або на $ 1,54 млрд у сярэднім за год, паведаміў дырэктар Даследчага цэнтра (ДЦ) Інстытута прыватызацыі і мэнэджмэнта Аляксандр Чубрык са спасылкай на звесткі праведзенага ДЦ даследавання, паведамляе interfax.by.

"Сумарныя страты ў актуальным рахунку Беларусі за перыяд рэалізацыі падатковага манеўру могуць скласці больш за $ 9,2 млрд ад уліку шэрагу базавых дапушчэнняў", – сказаў Чубрык журналістам у пятніцу ў Менску.

Ён растлумачыў, што ў ацэнцы, якую правёў ДЦ ІПМ, у якасці сцэнара выкарыстаны дапушчэнні, што кошт на нафту ў перыяд правядзення манеўру складзе $ 60 / бараль, Беларусь скароціць імпарт нафты з РФ з 18 млн тонаў у 2019 годзе да 15,4 млн тонаў у 2024 годзе, экспарт беларускіх нафтапрадуктаў зменшыцца з 10,9 млн тонаў да 8,3 млн тонаў. Здагадку пра зніжэнне аб'ёмаў экспарту нафтапрадуктаў і імпарту нафты эксперт патлумачыў чаканым падзеннем рэнтабельнасці нафтаперапрацоўкі.

Паводле ягонай ацэнкі, прамыя страты беларускага бюджэту ад паступовага абнулення экспартных мытаў на нафтапрадукты да 2024 года перавысяць $ 3,2 млрд. "Гэта стане сур'ёзным выклікам для бюджэту", – падкрэсліў Чубрык. Страты Беларусі ў знешнім гандлі таварамі за 2019–2024 гады ацэньваюцца на больш як $ 6 млрд у сувязі з падаражэннем кошту імпарту нафты з Расеі.

Паводле разлікаў ІЦ ІПМ, пры сцэнарным сусветным кошце на нафту ($ 60 / бараль) кошт 1 тоны сыравіны для беларускіх НПЗ у 2020 годзе вырасце на $ 36,1, у 2021 годзе – на $ 52,9, у 2022 годзе – на $ 70,4, у 2023 годзе – на $ 87,9 і ў 2024 годзе – на $ 105,5.

У 2018 годзе дэфіцыт рахунку бягучых аперацый плацёжнага балансу Беларусі склаў $ 265,6 млн (0,4% ВУП), што на 71,9% менш, чым у 2017 годзе.

Як паведамлялася, Беларусь вядзе перамовы з РФ пра магчымую кампенсацыю выдаткаў у сувязі з рэалізацыяй у РФ падатковага манеўру ў нафтавай сферы. Тэма кампенсацыі з'яўляецца адным з ключавых пытанняў у перамовах прэм'ер-міністраў дзвюх краінаў, якія адбудуцца ў Сочы 6 снежня, і на сустрэчы прэзідэнтаў Беларусі і Расеі (запланавана на 7 снежня). Асноўнай тэмай перамоваў прэзідэнтаў будзе абмеркаванне праграмы паглыбленай інтэграцыі дзвюх краінаў. Напярэдадні перамоваў афіцыйны Менск канстатуе захаванне шэрагу прынцыповых рознагалоссяў.