Вахтанг Кікабідзэ: Музыка «Песняроў» у мяне дома ёсць, я іх слухаю

У Менску на адкрыцці помніка герою з «Міміно» Вахтангу Кікабідзэ падарылі дыск «Песняроў».

Знакаміты актор прызнаўся, што, калі атрымаў запрашэнне ў Менск ад рэстарана-бровара «Сябры», спачатку падумаў, што яго разыгрываюць. І паверыў, толькі калі пабачыў квіткі на самалёт, піша kp.by.

Але шчаслівы быў прыехаць, бо ўважае, што грузіны і беларусы вельмі падобныя. Нягледзячы на салідны ўзрост, скінуўшы белую тканіну са скульптуры, якая выяўляе яго героя з фільма «Міміно», ён тут жа запаліў і з характэрным грузінскім акцэнтам сказаў: «На мяне маладога падобны».

А Ларыса Іванаўна дзе? - крыкнулі з натоўпу.

- Ларыса Іванаўна не прыехала, гэта не ў нашых сілах, - засмяяліся арганізатары візіту.

Вахтангу Кікабідзэ падарылі цукеркі, абразы, уручылі дыск «Песняроў».

- З Мулявіным мы вельмі часта перасякаліся на гастролях. І музыка «Песняроў» у мяне дома ёсць, я іх слухаю, - прызнаўся Кікабідзэ.

Ён заўважыў, што помнікаў яго герою з «Міміно» вельмі шмат - у Маскве, Ерэване, Тбілісі і нават у Амерыцы.

- Звычайна яны стаяць ля рэстаранаў, і таму многія думаюць, што гэтыя рэстараны належаць мне, - засмяяўся артыст.