Уставай, Беларусь!
17- Зміцер Бандарэнка
- 21.12.2019, 11:47
- 62,435
Прыйшоў час рашучых перамен.
Каардынатар грамадзянскай кампаніі «Еўрапейская Беларусь» Зміцер Бандарэнка пракаментаваў учорашнюю акцыю за незалежнасць Беларусі ў Менску:
- Удзельнікі акцыі ў Менску супраць інтэграцыі з Расеяй паказалі свету імкненне беларусаў жыць у свабоднай незалежнай Беларусі.
Гэтая акцыя стала самай масавай маніфестацыяй беларусаў за апошнія два гады ў Беларусі. У Вільні на цырымоніі перапахавання Каліноўскага і паўстанцаў беларусаў было яшчэ больш.
Вельмі парадавала, што лідары ўчорашняй акцыі не забыліся на сваіх таварышаў, - арыштаваных напярэдадні і кінутых за краты каардынатараў «Еўрапейскай Беларусі» Яўгена Афнагеля і Максіма Вінярскага. Тысячы людзей скандавалі «Свабоду - Афнагелю! Свободу- Вінярскаму! Свабоду - Урбановічу!».
Сённяшнія пратэсты не нарадзіліся на пустым месцы. Яны выраслі з пікетаў і мітынгаў «Еўрапейскай Беларусі» і БНК падчас «выбарчай кампаніі», а таксама працяглых акцый супраць бясчынстваў уладаў і амаральных бізнэсоўцаў у Курапатах.
Сярод выступоўцаў у Менску мы ўбачылі прадстаўнікоў розных палітычных сіл, чаго таксама не было вельмі даўно.
Беларусь абуджаецца. Усе адзначаюць, што 2020 год павінен стаць вырашальным у гісторыі нашай краіны, таму так важная беларуская салідарнасць сёння.
Каб быць сапраўды незалежнымі, мы павінны пазбавіцца ад дыктатуры. А для гэтага павінны быць адзінымі і моцнымі.
Кожны беларускі грамадзянін можа ўдзельнічаць у агульнай справе незалежна ад таго, дзе ён знаходзіцца.
Прыйшоў час рашучых перамен.
Уставай, Беларусь!