У Беларусі прайшлі суды над удзельнікамі «парламенцкіх выбараў»
84- 2.12.2019, 11:19
- 88,104
(Абноўлена) Улады спужаліся пратэстнай актыўнасці.
Адміністрацыйныя працэсы над удзельнікамі акцый, якія адбываліся падчас выбарчай кампаніі, прайшлі сёння ў судзе Першамайскага раёна Менска. Большасць падсудных - актыўныя ўдзельнікі нядаўняй парламенцкай кампаніі, кандыдаты ў дэпутаты або іх давераныя асобы.
На 11.15 2 снежня быў прызначаны разгляд спраў актывістаў, у дачыненні да якіх складзеныя пратаколы на падставе арт.23.34 КоАП (удзел у несанкцыянаваным масавым мерапрыемстве):
Асудзілі грамадскіх актывістаў Дзяніса Красачку, Ніну Багінскую, актывістаў грамадзянскай кампаніі «Еўрапейская Беларусь» Леаніда Кулакова і Вольгу Нікалайчык.
Справу Дзяніса Красачкі разглядала суддзя Анастасія Ляўкоўская.
Справу Ніны Багінскай - суддзя Таццяна Ліннік.
Вольгу Нікалайчык судзіла Ганна Ігнацьева.
Справу Леаніда Кулакова разглядала Святлана Чараповіч.
Таксама ў Воршы праходзіць суд над блогерам і актывістам Шэрым Катом (Змітром Казловым). Раней атрымаў 15 дзён за перапіс ў сацыяльных сетках Алесь Круткін. Распачатая адміністрацыйная справа супраць адной з лідарак «Еўрапейскай Беларусі» Ірыны Халіп.
Таксама найбліжэйшым часам пройдуць суды над іншымі прадстаўнікамі «Еўрапейскай Беларусі» - Андрэем Шарэндам, Яўгенам Афнагелем, Аксанай Юшкевіч, Максімам Вінярскім, грамадскай актывісткай Настай Гусевай і адным з лідараў Беларускай хрысціянскай дэмакратыі Паўлам Севярынцам.
17:20
Пасля вялікага перапынку а 17:00 аднавіўся «судовы канвеер» над удзельнікамі «парламенцкіх выбараў».
Леанід Кулакоў - штраф 50 базавых адзінак (1250 рублёў). Суддзя Чараповіч.
Вольга Нікалайчык - штраф 50 базавых адзінак (1250 рублёў). Суддзя Ігнацьева.
Дзяніс Красачка - штраф 25 базавых адзінак (625 рублёў). Суддзя Ляўкоўская.
Ніна Багінская - штраф 50 базавых адзінак (1250 рублёў). Суддзя Ліннік.
13:18
Вольгу Нікалайчык судзяць за ўдзел у масавым мерапрыемстве 16-га лістапада. У матэрыялах справы ў якасці доказу суд праглядае відэазапіс з акцыі...якая прайшла 8 лістапада. У відэа гучыць песня «Тры чарапахі».
13:04
Суд над Леанідам Кулаковым перанесены на 17.00. Пратакол адправілі на дапрацоўку.
12:41
Суд абвясціў перапынак да 17:00 паводле справы Дзяніса Красачкі.
12:40
Суд праходзіць без удзелу Нікалайчык. Сведкамі таксама выступаюць супрацоўнікі АМАП Трышкін і Місюля. Яны кажуць пра тое, што ў час свайго дзяжурства ўбачылі масавае мерапрыемства на Кастрычніцкай плошчы, а «мерапрыемствы ж там забароненыя».
12:25
Выступае сведка Павел Асавік. Ён распавёў, што яму паведамілі на службе аб тым, што мерапрыемства, дзе выступаў Красачка, было несанкцыянаваным. Красачка цікавіцца ў супрацоўніка АМАП: «Як вы змаглі вызначыць, законна ці не мерапрыемства, дзе я выступаў? Гэта ўваходзіць у паўнамоцтвы тэрытарыяльнай выбарчай камісіі (але запыт вы туды не накіроўвалі). Вы павінны ахоўваць».
11:55
Красачка прыйшоў на суд з Анатолем Лябедзькам, у іх яшчэ будзе сведка Ігар Маслоўскі. Актывіст збіраецца хадайнічаць аб тым, каб працэс праводзіўся ў зале суда, а не ў кабінеце суддзі. Па справе з боку абвінавачання прысутнічаюць сведкі - два супрацоўнікі АМАП.
Красачка хадайнічае аб адводзе суддзі. Абвяшчаецца перапынак для прыняцця пастановы. Сведкамі выступаюць супрацоўнікі АМАП Ілля Лемантовіч і Павел Асавік.
У выніку суд адмовіў у адводзе суддзі.
Суддзя зачытвае пратакол: Красачка парушыў парадак пікетавання, узяў актыўны ўдзел у масавых мерапрыемствах, якія выходзяць за рамкі перадвыбарнай агітацыі, выкрыкваў «Жыве Беларусь».
Сам Дзяніс Красачка на гэта адказаў, што падчас «выбараў» акцыі рэгламентуюцца выбарчым кодэксам, а не законам аб масавых мерапрыемствах. Ён удзельнічаў у акцыі ў рамках агітацыі кандыдата ў «дэпутаты» Маслоўскага, таму ўпэўнены, што ў ягонай дзейнасці няма парушэння закона аб масавых мерапрыемствах.