«Прадай машыну, але грошы аддам потым»

Як падманваюць даверлівых прадаўцоў аўто ў Беларусі.

Гарадзенец Дзмітрый надумаў прадаць свой Nissan Almera і выставіў аб'яву ў інтэрнэце, на якую адгукнуўся іншы жыхар Гародні, назавем яго Андрэй. Сустрэліся і дамовіліся пра кошт – 2300 даляраў, піша сайт newgrodno.by . Вось толькі Андрэй сказаў, што ў яго ёсць 150. Астатнія 2150 даляраў Андрэй абяцаў вярнуць цягам 3-4 месяцаў.

Для пераканальнасці ўгоды, Андрэй прапанаваў звярнуцца да натарыуса з афармленнем дамовы, згодна з якой вынікала, што Андрэй пазычыў у Дзмітрыя грошы – 2150 даляраў, вярнуць якія абавязваецца да 8 лістапада 2018 года. Якіх-небудзь звестак пра тое, што перададзены аўтамабіль, а не грошы, у дакуменце не было.

– У натарыяльнай канторы прабылі гадзіну, вярнуліся дадому, дзе і адбылася перадача аўтамабіля з дакументамі і ключамі ў іншыя рукі. Разам кампаньёны заехалі ў страхавую кампанію, дзе Андрэй аформіў страхоўку, – апавядае прадстаўнік УУС Гародні.

Карміў абяцанкамі

Час ішоў, а грошай Дзмітрый так і не атрымаў, хоць і тэлефанаваў, нагадваючы пра пазыку. Але Андрэй толькі карміў яго абяцанкамі: маўляў, хутка верне, пакуль «напружна» з грашыма. А далей і зусім перастаў адказваць на званкі. Дзмітрый звярнуўся ў натарыяльную кантору з заявай, у дачыненні да Андрэя была распачатая выканальная вытворчасць. Надалей ён напісаў заяву ў міліцыю.

Выплачваць суму Андрэй першапачаткова не збіраўся. Больш за тое, такіх грошай у яго ніколі не было. Прапанаваў заключыць дамову пазыкі, каб Дзмітрый не западозрыў яго падступных намераў. У пачатку жніўня летась «Нісан» ён прадаў праз аб'яву ў інтэрнэце незнаёмым людзям без афармлення якіх-небудзь дакументаў, бо машына была з транзітнымі нумарамі, гэта значыць знятая з уліку. Рэалізаваў паводле кошту значна ніжэйшага за пачатковы, атрыманыя ад продажу сродкі выдаткаваў на ўласнае меркаванне. Маёмасная шкода нанесеная на суму 2150 даляраў, што склала 4288,18 рубля.

Усведамляў, што падманвае, і каяўся...

«На той момант я ўсведамляў, што раблю злачынства», – прызнаецца Андрэй. Сваю віну ён прызнаваў не аднойчы. Пачынаючы з 2012 года В. пяць разоў асуджаны: за крадзеж і чатыры разы за махлярства. У якасці пакаранняў былі прызначаныя папраўчыя працы, пазбаўленне волі з канфіскацыяй маёмасці і без, з адтэрміноўкай выканання пакарання, апошні раз асуджаны да 5 гадоў пазбаўлення волі. Андрэй разведзены, не працуе, хоць у яго на ўтрыманні малагадовае дзіця. Усё гэта рыскі да ягонага асацыяльны партрэта.

5 гадоў у ВК. Рэжым – строгі

Андрэй сеў на лаву падсудных 6-ы раз. І зноў за махлярства, здзейсненае паўторна. На падставе ч.2 арт.209 КК судом Кастрычніцкага раёна г. Гародні ён асуджаны да пазбаўлення волі на 3 гады. Шляхам паглынання больш лёгкага пакарання канчаткова вызначанае пазбаўленне волі на 5 гадоў з адбываннем у папраўчай калоніі ва ўмовах строгага рэжыму. Час пайшоў з 24 кастрычніка сёлета.