З банкаў Казахстана зніклі мільярды даляраў

14 найбуйнейшых банкаў краіны маюць патрэбу ў падтрымцы.

Урад Казахстана рыхтуе новы пакет дапамогі банкаўскай сістэме, якая пакутуе ад дрэнных крэдытаў і недахопу капіталу, паведамляе finanz.ru.

Падтрымка спатрэбіцца чатыром з 14 найбуйнейшых банкаў краіны, дзе са жніўня ЦБ праводзіць рэвізію актываў, распавялі Reuters банкіры і крыніцы, знаёмыя з планамі ўладаў.

Пад праверку Нацбанка, якая завершыцца ў канцы снежня, трапілі ў тым ліку казахскія "дочкі" Ашчадбанка, Альфа-банка і ВТБ, а таксама Халык-банк, Kaspi, Forte, БЦК, АТФ, Еўразійскі, Jýsan Bank, Bank RBK, Altyn Bank, Нурбан і Хоўм Крэдыт.

Са слоў аднае з крыніц Reuters, выяўленыя ЦБ праблемы ацэньваюцца ў трыльён тэнге або 2,6 млрд даляраў. Такую суму давядзецца выдаткаваць на пакрыццё дзір у банках, што дагэтуль пакутуюць ад наступстваў дэвальвацыі тэнге і падзенні коштаў на нафту.

Папярэдні пакет дапамогі на 13 млрд даляраў быў бяссільны аздаравіць банкаўскую сістэму, на балансе якой па-ранейшаму знаходзяцца безнадзейныя крэдыты. Грошы дзяржавы папоўняць капітал і дазволяць спісаць гэтыя актывы.

Першая порцыя дапамогі можа быць выдзеленая ў пачатку наступнага года - пакет складзе блізу 1 млрд даляраў. «Гэта ўжо праца, якая будзе праводзіцца ў студзені-лютым месяцы. У лютым канчатковыя індывідуальныя планы з кожным фінансавым інстытутам будуць падпісаныя, што мы будзем рабіць у найбліжэйшыя два, тры гады», - распавёў кіраўнік Нацбанка Казахстана Ербалат Дасаеў.

Паводле разлікаў Moody's, недахоп рэзерваў у банкаўскай сістэме Казахстана вар'іруецца ад 400 да 600 мільярдаў тэнге (1,1-1,6 млрд даляраў).

Незразумелым застаецца тое, хто прафінансуе новыя ўліванні ў банкі. Калі ўскласці гэты абавязак на ўрад, гэта ўдарыць па бюджэце і вымусіць Мінфін займаць грошы на рынку.

Іншы сцэнар - пайсці па шляху Банка Расеі, які фінансаваў выратаванне банкаў за кошт грашовай эмісіі і за пяць гадоў, паводле ацэнкі Fitch, «надрукаваў» суму, эквівалентную 80 млрд даляраў (удвая больш, чым было выдаткавана на Алімпіяду ў Сочы).

Зрэшты, у гэтым выпадку павелічэнне грашовай масы можа ўдарыць па тэнге, які ў 2015 годзе быў дэвальваваны ўдвая - з 188 да 364 тэнге за даляр, і з тых часоў працягвае павольна таннець, абнаўляючы гістарычныя мінімумы.

На 18.43 мск аўторка тэнге таргуецца на адзнацы 386,62 за даляр, страчваючы 0,2% за дзень. 9 кастрычніка курс дасягаў рэкордных 391,32 тэнге за даляр.