У Беларусі пачалі павышаць кошт праезду ў гарадскім і прыгарадным транспарце

Як змяніўся кошт квіточкаў?

У Беларусі ў рэгіёнах пачалі павышаць кошт праезду ў гарадскім і прыгарадным грамадскім транспарце. Першым рэгіёнам, у якім паднялі кошт праезду, стала Берасцейская вобласць. Змены прадугледжаныя пастановай Берасцейскага аблвыканкама № 713 ад 3 снежня. У найбліжэйшы час кошт праезду павінны падняць і ў астатніх рэгіёнах. Партал tut.by паглядзеў, як змяніўся кошт квіточкаў.

Квіток на адну паездку на звычайных і хуткасных маршрутах у Берасцейскай вобласці падаражэе на 5 капеек – да 60 капеек, а на экспрэсных – да 70 капеек.

Пры гэтым памежныя максімальныя тарыфы на прыгарадныя аўтамабільныя перавозкі пасажыраў у рэгулярных зносінах за адзін кіламетр праезду таксама вырастуць і складуць:

на звычайных маршрутах – 0,08 рубля (цяпер – 0,07 рубля);

на хуткасных маршрутах – 0,1 рубля (цяпер – 0,09 рубля);

на экспрэсных маршрутах – 0,11 рубля (цяпер – 0,10 рубля);

на дадатковых рэйсах – 0,1 рубля (цяпер – 0,09 рубля).

Як чакаецца, у найбліжэйшы час павінна быць прынятая пастанова пра павышэнне кошту праезду ў гарадскім і прыгарадным транспарце і ў іншых рэгіёнах, а таксама ў Менску.

Нагадаем, у верасні транспартнікі накіравалі ў МАРГ свае прапановы ў павышэнні кошту праезду ў гарадскім грамадскім транспарце і абгрунтаванне росту коштаў. У некаторых рэгіёнах прапаноўвалі падняць кошт квіткоў адразу на 10 капеек.

У рэгіёнах пастанову пра павышэнне кошту праезду на звычайных і хуткасных маршрутах апошні раз прымалі ў лістападзе летась. Тады квіток на адну паездку на гарадскім транспарце падаражэў да 55 капеек, а пры набыцці ў кіроўцы – да 60 капеек. Кошт праезду ў аўтобусах экспрэсных маршрутаў павялічыўся да 65 капеек. У ліку першых кошт квіткоў павялічылі транспартнікі Менскай вобласці.

У Менску кошт праезду ў канцы мінулага года не сталі падымаць, хоць такая магчымасць абмяркоўвалася. У сталіцы апошні раз кошт праезду ў гарадскім грамадскім транспарце вырас з 1 лістапада 2017 года – на 5 капеек. Пасля павышэння квіток на адну паездку на наземным гарадскім транспарце падаражэў да 60 капеек.

Колькі беларусы кампенсуюць за праезд у гарадскім грамадскім транспарце?

У 2018 годзе беларусы кампенсавалі 70% выдаткаў на праезд у гарадскім аўтамабільным транспарце. Астатнюю суму кампенсуюць з дзяржбюджэту. Узровень кампенсацыі затратаў адрозніваецца ў Менску і абласцях.

У абласцях узровень кампенсацыі беларусамі выдаткаў на перавозкі пасажыраў гарадскім аўтамабільным транспартам складаў 82,1%, а ў Менску – 62,3%, – паведамілі ў МАРГ. Пры гэтым у Менску ўзровень кампенсацыі беларусамі выдаткаў на перавозкі наземным гарадскім грамадскім транспартам (без уліку гарадскіх электрычак БЧ) склаў летась 55,8%, а ў метрапалітэне – 73,9%.

У «Менсктрансе» ў красавіку сёлета апавядалі, колькі павінен каштаваць праезд, каб грамадскі транспарт у сталіцы акупляўся.

– Гэта не таямніца: у найбліжэйшых краінах, напрыклад у краінах Балтыі, праезд каштуе 1–1,2 еўра. Нават у Расеі гадоў пяць таму праезд каштаваў прыкладна 1 даляр. Сёння прыкладна такі ж кошт квітка павінен быць і ў нас, каб транспарт акупляўся, – апавёў намеснік гендырэктара «Менсктрансу» Віктар Тозік.

У Менску пасажыры аплачваюць ад 40 да 50% ад сабекошту праезду, у залежнасці ад віду транспарту, паведаміў у красавіку сёлета першы намеснік генеральнага дырэктара «Менсктранса» Алег Дзюбенка.

У МАРГ тлумачылі, што «Менсктранс» пры падліку ўзроўню кампенсацыі пасажырамі кошту праезду не бярэ да ўвагі ПДВ. Таму ў гэтых прадпрыемствах узровень кампенсацыі менчукамі кошту праезду ніжэйшы, чым звесткі МАРГ.

Улады плануюць да 2020 года ўзровень кампенсацыі насельніцтвам затратаў гарадскім аўтамабільным транспартам падняць да адзнакі не менш за 80%, у тым ліку ў абласцях – не менш за 90% і Менску – не менш за 70%, а прыгарадным аўтамабільным транспартам – не менш за 65%.