Памежнікі адкрылі стральбу на беларуска-літоўскай мяжы

Беларускія памежнікі паведамілі пра прарыў двух аўто праз мяжу.

Беларускія памежнікі вымушаны былі страляць па меркаваным кантрабандыстам. Гэта адбылося 29 лістапада.

- Ад Службы аховы дзяржаўнай мяжы пры МУС Літоўскай Рэспублікі паступіла інфармацыя аб магчымым перамяшчэнні таварна-матэрыяльных каштоўнасцяў на транспартным сродку праз мяжу. У ходзе праверкі згаданага ўчастка памежны нарад у непасрэднай блізкасці ад дзяржаўнай мяжы выявіў два аўтамабілі, кіроўцы якіх праігнаравалі законныя патрабаванні аб прыпынку і на вялікай хуткасці паспрабавалі схавацца, - паведамляе прэс-служба Дзяржаўнага памежнага камітэта.

Памежнікі ўжылі табельную зброю. Яны затрымалі адзін аўтамабіль, другі ўцёк. Асобы, якія маюць дачыненне да парушэння мяжы, выяўленыя. Праводзіцца праверка. Зламыснікам пагражае да двух гадоў пазбаўлення волі за наўмыснае незаконнае перасячэнне дзяржаўнай мяжы з выкарыстаннем транспартнага сродку.