Відэафакт: У Менску пажарныя не маглі праехаць на выклік праз прыпаркаваныя аўто
11- 29.11.2019, 21:26
- 37,495
Пажарныя аўтамабілі затрымаліся ў вузкім праездзе.
Чытачы «Онлайнера» білі трывогу: на вуліцу Усходнюю ў Менску выклікалі пажарных: у адным з пад'ездаў адчуваўся пах дыму. Пажарныя прыехалі, а разам з імі і хуткая (не выключана, што ў яе быў іншы выклік). Але пад'ехаць да патрэбнага пад'езда атрымалася далёка не адразу - перашкаджалі прыпаркаваныя аўтамабілі.
- Вельмі праблемны двор, - канстатуе адзін з чытачоў. - Машыны кідаюць абы-дзе, як патрапіла. Прычым спрабавалі развязаць праблему, нават паўсферы ўсталёўвалі - ніякага толку, паркуюцца нават над гэтымі паўсферамі. У гэтым двары ранкамі ўтвараюцца заторы, уявіце. А шлагбаўм усталяваць нам не даюць.
І вось сітуацыя: тры аўтамабілі МНС і адна хуткая на нейкі час затрымаліся ў вузкім праездзе, не маючы магчымасці рухацца далей.
- Там у праездзе прастакутная пляцоўка, дзе машыны былі прыпаркаваныя хаатычна. У выніку грузавыя аўто МНС спачатку праехаць не маглі.
Праз некаторы час ратавальнікі ўсё ж здолелі праехаць. На шчасце, сур'ёзнай небяспекі не было, чытач распавёў, што, як высветлілася, адбылося задымленне ў электрашчытку.
- Цяпер абышлося, а калі сапраўды дрэннае нешта здарыцца? Таксама з акна прыйдзецца назіраць, як дапамога не можа праехаць праз двор? - асцерагаецца чытач.
У Менскім гарадскім упраўленні МНС пацвердзілі факт выкліку выратавальнікаў на вуліцу Усходнюю.
- Сапраўды, праблема з прыпаркаваным у дварах транспартам актуальная для горада. Нашы супрацоўнікі - прафесіяналы, калі ёсць хоць нейкая магчымасць праехаць - яны праедуць. Калі гэта немагчыма зрабіць, яны бягуць да месца здарэння разам з неабходным абсталяваннем, выкарыстоўваюцца пажарныя рукавы. Бывалі выключныя выпадкі, калі гаворка сапраўды ішла пра пагрозу жыцця, калі аўтамабілі, якія заміналі праезду, адсоўвалі.
Таксама раней у МНС тлумачылі, што кіроўца пажарнай машыны паведамляе пра цяжкасці з праездам у дзяжурную частку, адтуль інфармацыя паступае ў ДАІ. У пажарных машынах устаноўленыя відэарэгістратары, так што з вялікай доляй верагоднасці тых кіроўцаў, якія прыпаркаваліся не паводле ПДР, прыцягнуць да адказнасці.