Кожны трэці жыхар Літвы атрымлівае 1277 еўраў на месяц і больш

Заробкі ў балтыйскай краіне прадаўжаюць расці.

Фонд сацыяльнага страхавання Літвы (Sodra) прадставіў змены заробку ў краіне, розніцу даходаў у рэгіёнах і тэндэнцыі на рынку працы, піша Delfi.

На падлікі «Содры», сярэднія даходы жыхароў за месяц павялічыліся на 9,5% і ў трэцім квартале склалі 1277 еўраў «на паперы». Такія і больш высокія даходы былі ў кожнага трэцяга жыхара краіны.

Страхавыя даходы жыхароў, з якіх плацяць падаткі, у трэцім квартале ў параўнанні з трэцім кварталам 2018 года, павялічыліся на 111 еўраў «на паперы».

«Цягам трох кварталаў рост даходаў застаецца падобным, у мінулым ён быў вышэйшым. Агулам даходы работнікаў «на рукі» павялічыліся на 15%, або на 104 еўры і цяпер складаюць 814 еўраў. Змяняецца і структура працаўнікоў паводле іх даходаў. Значна скарацілася колькасць людзей , якія атрымліваюць мінімальныя даходы», - сказала прадстаўніца «Содры» Крысціна Зіцікінітэ.

Паводле яе слоў, больш за ўсё павышэнне даходаў адчуваюць людзі з невялікімі даходамі, даходы якіх залежаць ад мінімуму.

Паводле інфармацыі «Содры», заробак, меншы за мінімальны, у верасні атрымлівалі 9% работнікаў, а ў 2017 годзе іх было 14%.

Калі разглядаць заробкі ў рэгіёнах, то розніца велізарная. У залежнасці ад раёна яна можа складаць 30-40%.

«Мы бачым, што палова працоўнага насельніцтва жыве ў 6 муніцыпалітэтах з 60. Большая частка ў Вільні - амаль 22%, у Коўне і Ковенскім раёне, у Клайпедзе і ў Шаўляі», - сказала Зіцікітэ.

Менавіта ў гэтых муніцыпалітэтах заробак расце больш за ўсё.

У трэцім квартале гэтага года, у параўнанні з трэцім кварталам мінулага года, лідарам у росце заробкаў сярод буйных рэгіёнаў было Коўна і Ковенскі раён - 10%, у Вільні і Віленскім раёне рост даходаў склаў 9%, у Шаўляй - 8%, у Клайпедзе - 7%.

Але калі браць агулам, то рэкардсменам у росце даходаў быў горад Шырвінтай, дзе даходы павялічыліся на 17% (хутка раслі даходы і ў Вісагінасе, Прэнай - 12%), а менш за ўсё - на 7% - яны выраслі не толькі ў Клайпедзе, але і ў Панявежысе, Рокішкскім і Пасвальскім раёнах.

Вільня па-ранейшаму застаецца лідарам у групе буйных муніцыпалітэтаў. У сталіцы сярэднія даходы складаюць 1490 еўраў, у Коўне і Ковенскім раёне - 1250, у Клайпедзе - 1180, а ў Шаўляй - 1000 еўраў.

Яшчэ большая розніца паміж сталіцай і перыферыйнымі раёнамі. У мэрыях Шальчынінкай, Скуадаса, Вілкавішкіса, Кельме, Пагегяй, Калварыі сярэднія даходы складаюць 900 еўраў - гэта на 40% менш, чым у Вільні.

«Содра» таксама паведамляе, што ў Літве хутка расце колькасць работнікаў, старэйшых за 55 гадоў (кожны 5). Іх даходы на 1/4 ніжэйшыя, чым у 35-гадовых спецыялістаў.

Паводле інфармацыі за трэці квартал, тэмп росту даходаў работнікаў 55-64 гадоў склаў 9%.

Актыўнасць работнікаў 55-64 гадоў на рынку працы ніжэйшая і складае 57%. Іх сярэднія даходы складаюць 1144 еўры - на 10% ніжэй сярэдніх у краіне (1277 еўраў) і нашмат ніжэй, чым у работнікаў 35-44 гадоў - 1482 еўры «на паперы».

«Наша грамадства старэе, але ў нас ёсць некалькі яркіх груп, у якіх колькасць жыхароў падобная. Самыя актыўныя - у групе 35-54 гадоў, у іх ліку працуюць 70%, і прадстаўнікі гэтай групы атрымліваюць самыя вялікія даходы», - сказала Зіцікітэ.