Фундатар «расейскай вясны» разарыўся праз санкцыі ЗША і ЕЗ

Адзін з удзельнікаў анэксіі Крыма застаўся без бізнэсу.

Бізнэс інвестыцыйнага фонду Marshall Capital прадпрымальніка Канстанціна Малафеева спыніўся пасля ўвядзення супраць яго персанальных санкцый ЗША ў 2014 годзе. Пра гэта ён распавёў выданню The Bell. Расеец уважаецца за аднаго з удзельнікаў анэксіі Расеяй Крыма і спонсараў сепаратыстаў на ўсходзе Украіны. На падлікі журналістаў, большая частка ягонага існага бізнэсу - стратная.

Малафееў адным з першых расейцаў трапіў у санкцыйныя спісы ЗША і Еўразвязу. Ягоны былы супрацоўнік Ігар Стралкоў (Гіркін) курыраваў перамовы самаабвешчанага прэм'ер-міністра Крыма Сяргея Аксёнава з кіраўніцтвам Расеі перад анэксіяй, а затым - стаў адным з галоўных сепаратыстаў на ўсходзе Украіны. Ягоны былы кансультант Аляксандр Барадай у 2014 годзе на ўказанне з Масквы стаў першым кіраўніком самаабвешчанай «Данецкай народнай рэспублікі».

Актывы фонду, які спыніў працу, на піку ацэньваліся ў паўтара мільярда даляраў. У 2014 годзе пасля ўвядзення санкцый Малафееў планаваў стварыць новы фонд аб'ёмам, не меншым за два мільярды. Аднак санкцыі перашкодзілі гэтым планам, пісала ў 2015 годзе газета «Коммерсантъ».

Цяпер увесь бізнэс Малафеева засяроджаны ў холдынгу «Царград», - намагае ён. Ён стратны. Дзясяткі рахункаў кампаній, якія ўваходзяць у групу, заблакаваныя на патрабаванне ФНС. Найбуйнейшая дачка групы праходзіць працэдуру банкруцтва. Усяго ў холдынг уваходзяць два дзясяткі кампаній, але рэальных актываў у іх крыху, піша The Bell. Усе яны, калі верыць іх справаздачнасці ў базе звестак СПАРК, скончылі мінулы год са стратамі 700 мільёнаў рублёў, а ў папярэднія чатыры гады сума стратаў кампаній складала ад 550 мільёнаў да мільярда 800 мільёнаў рублёў за год. Найбольшы мінус прыносяць яго медыяактывы - у тым ліку, сайт «Царград-ТБ» (тэлеканал з такой жа назвай быў закрыты).

Няўдачы ў бізнэсе не спыняюць палітычную актыўнасць Малафеева. Ён падтрымлівае рух «Дзвюхгаловы арол», які суразмоўцы The Bell называюць нарыхтоўкай для новай кансерватыўнай партыі. Як Малафееў фінансуе ўсе свае пачынанні - незразумела. Сам ён кажа, што дастаткова зарабіў раней, а цяпер да бізнэсу стаў раўнадушным.

Малафеева звязваюць з крыптавалютнай біржай Wex, з рахункаў якой зніклі $450 мільёнаў даляраў. Біржа страціла актывы ўкладчыкаў вясной 2018 года. У расследаванні Расейскай службы ВВС сказана, што ў траўні 2018 сузаснавальнік біржы Аляксей Білючэнка перадаў усю крыптавалюту людзям, якія звязвалі сябе з ФСБ. Перадача ажыццяўлялася пры пасярэдніцтве чалавека з голасам, падобным на голас Малафеева, адзначаецца ў матэрыялах крымінальнай справы аб знікненні грошай з біржы. Брытанскае выданне перадало голас пасярэдніка з запісу на крыміналістычную экспэртызу - там пацвердзілі, што ён ідэнтычны голасу бізнэсоўца.