«Улада проста спалохалася рэальнай альтэрнатывы»

У Берасці зноў кармілі галубоў на знак пратэсту супраць завода АКБ.

На плошчы Леніна ў Берасці 17 кастрычніка традыцыйна сабраліся праціўнікі акумулятарнага завода. На гэты раз пакарміць галубоў прыйшлі больш за 100 чалавек, паведаміў «Брестской газете» берасцейскі праваабаронца Раман Кісляк.

На гэтым тыдні змагары з заводам АКБ абмяркоўвалі спробы фальсіфікацыі на «выбарчых участках». У тым ліку гаварылі і аб нашумелым выпадку, які адбыўся ў горадзе 13 лістапада на адным з выбарчых участкаў на вул. Луцкай. Назіральнік тады зняў на відэа дзяўчыну з пачкам бюлетэняў у руках. На роліку бачна, як брунетка заходзіць у кабінку для галасавання, а потым выходзіць з яе з некалькімі бюлетэнямі, складзенымі напалову.

Яшчэ адной тэмай абмеркавання стала зняцце з перадвыбарнай гонкі кандыдатаў у дэпутаты ад актывістаў.

Нагадаем, на парламенцкія выбары вылучалі свае кандыдатуры ў якасці дэпутатаў «палаты прадстаўнікоў» чатыры супраціўнікі завода АКБ пад Берасцем. Зарэгістравалі толькі аднаго - Уладзіміра Мароза ў Берасцейскай Памежнай выбарчай акрузе №4. У рэгістрацыі адмовілі Раману Кісляку - у Берасцейскай Цэнтральнай выбарчай акрузе №2, Аляксандру Кабанаву - у Берасцейскай Заходняй акрузе №1 і Алене Макарэвіч - у Берасцейскай Усходняй акрузе №3. Зрэшты, Уладзімір Мароз нарэшце таксама быў зняты з перадвыбарнай гонкі.

Нягледзячы на тое, што гэтых кандыдатаў знялі, людзі іх падтрымліваюць, кажа праваабаронца. Яны мяркуюць, што ўлада проста спалохалася рэальнай альтэрнатывы, таму актывіста (Мароза - заўв. Аўт.) і пазбавілі рэгістрацыі.

Пасля сустрэчы на плошчы людзі зноў прайшлі цэнтральнымі вуліцамі Берасця - Пушкінскай і Савецкай да кінатэатра «Беларусь». Затрыманняў не было.

Будаўніцтва акумулятарнага завода на прамысловай пляцоўцы «Аэрапорт» у СЭЗ «Брэст» пачалося ў канцы 2017 года. Запуск першапачаткова планаваўся ў жніўні 2018 года, потым у канцы 2018 года. У 2019 годзе тэрміны таксама не раз падаўжаліся. Адначасова з будоўляй у Берасцейскім рэгіёне пачалася кампанія супраць з'яўлення ў СЭЗ гэтага прадпрыемства. Цягам усяго гэтага часу ініцыятыўная група берасцейцаў і жыхароў раёна, а таксама яе прыхільнікі ўвесь час заяўлялі пра шматлікія парушэнні на розных этапах рэалізацыі праекта.

З 4 сакавіка 2018 года кожную нядзелю праціўнікі завода выходзяць на плошчу Леніна пакарміць галубоў і тым самым выказаць свой маўклівы пратэст супраць будаўніцтва ў СЭЗ «Брэст» акумулятарнага завода. Толькі аднойчы ім дазволілі сабрацца і пратэставаць - мітынг «Берасцейкі супраць свінцу» прайшоў 29 красавіка ў парку воінаў-інтэрнацыяналістаў і сабраў блізу 2 000 чалавек. У наступным шматлікія заяўкі на правядзенне мітынгаў і пікетаў супраць завода былі пакінутыя без задавальнення.

Кампанія ў барацьбе з заводам стала самым доўгім пратэстам у гісторыі сучаснай Беларусі.