Беларускія турысты, якія адпачывалі ў Шарм-эль-Шэйху, загінулі

Імаверна, адбылося атручэнне.

Два беларускія турысты загінулі ў адным з гатэляў Шарм-эль-Шэйха ў Егіпце. Пра гэта паведамляе Рэспубліканскі саюз туріндустрыі са спасылкай на ліст ад Дэпартамента турызма. Дакладнай прычыны гібелі пакуль не назвалі, але з высокай імавернасцю ёй стала харчовае атручэнне, піша tio.by.

Мужчына 1963 года нараджэння і жанчына 1965 году нараджэння, муж і жонка з Беларусі, знаходзіліся на адпачынку ў гатэлі Shаrm Reef 4*. Як паведамляе ў лісце СК, яны засяліліся ў гатэль 16 кастрычніка. Пасля аднаго з вячэрніх прыёмаў ежы (як мяркуецца, гэта была рыба) мужчына адчуў недамаганне: боль у жываце, ліхаманку, слабасць, тэмпература паднялася да З8°С. Яму паставілі дыягназ «востры гастраэнтэрыт» і даставілі ў шпіталь у Шарм-эль-Шэйху. 24 кастрычніка мужчына памёр, яго цела транспартавалі ў Беларусь.

Яго жонка звярталася ў шпіталь Шарм-эль-Шэйха па меддапамогу з такімі ж сімптомамі, але 23 кастрычніка. Праз два дні жанчына прыбыла ў Менск, і ў сувязі з пагаршэннем стану яе даставілі ў Гарадскую клінічную інфекцыйную бальніцу, дзе 13 лістапада жанчына памерла.

Для ўстанаўлення дакладнай прычыны смерці двух беларускіх турыстаў у егіпецкім гатэлі СК прызначыў судова-медыцынскія экспертызы. Следчыя дзеянні яшчэ не завершаны. Аднак у гатэлі Shаrm Reef 4* могуць знаходзіцца іншыя турысты з Беларусі.

Дэпартамент турызму просіць устрымацца ад накіроўвання ў названы гатэль беларускіх турыстаў і прыняць захады ў ахове жыцця і здароўя беларускіх турыстаў, якiя ўжо знаходзяцца там.