Беларускі фільм трапіў адразу ў дзве намінацыі на «Оскар»

Прарыў беларускага кіно?

Фільм «Дэбют», зняты беларускай Настай Мірашнічэнкай у 2017 годзе, будзе намінаваны на «Оскар» адразу ў дзвюх катэгорыях - «найлепшы дакументальны фільм» і «Найлепшы фільм на замежнай мове», піша kp.by.

Першапачаткова беларускі «оскараўскі» камітэт выставіў кінастужку ад нашай краіны ў катэгорыі «Найлепшы фільм на замежнай мове». Але потым амерыканцы самі прапанавалі падавацца яшчэ ў адну катэгорыю.

- Сам амерыканскі «оскараўскі» камітэт прапанаваў нам паўдзельнічаць з «Дэбютам» у намінацыі «Найлепшы дакументальны фільм». Наогул, каб патрапіць у яе, трэба выканаць шэраг умоў. Напрыклад, каб фільм выйграў на кінафестывалі класа «А» або акрэдытаваным фестывалі «Оскар», а ў ЗША прайшло 200 паказаў у кінатэатрах. Так, гэта можна зрабіць, але каштавацьме вельмі дорага. Атрымліваецца, для нас зрабілі выключэнне, - распавядае прадусар фільма «Дэбют» Віктар Лабковіч.

Ён удакладніў, што ў намінацыі «Найлепшы фільм на замежнай мове» праз высокую канкурэнцыю шанцы прайсці з доўгага спісу (лонг-ліста) у кароткі (шорт-ліст) невялікія. А ў дакументальнай намінацыі ёсць усе шанцы пазмагацца.