Турцыя заявіла пра рознагалоссі з Расеяй праз С-400

Гэта можа сарваць пастаўкі расейскіх ЗРК.

Чарговыя пастаўкі з Расеі ў Турцыю зенітнай ракетнай сістэмы (ЗРС) С-400 «Трыумф» могуць затрымацца з прычыны рознагалоссяў паміж бакамі, якія датычацца пытання перадачы тэхналогій. Пра гэта паведамляе Defense News са спасылкай на заяву кіраўніка сакратарыяту абароннай прамысловасці рэспублікі Ісмаіла Дэміра, паведамляе lenta.ru.

Паводле ягоных словаў, «тэхнічная праца прадаўжаецца». «Мы плануем графік на наступны год. У адрозненне ад першай [партыі], тут ёсць супольная вытворчасць і перадача тэхналогій. Гэта выходзіць за рамкі "давайце хутка набудзем і ўсталюем" першай сістэмы», – сказаў чыноўнік.

Выданне таксама прывяло каментар неназванага турэцкага спецыяліста, згодна з якім затрымка чарговай пастаўкі С-400 «Трыумф» магла быць спланаваная першапачаткова з мэтай змякчыць узаемаадносіны Анкары і Вашынгтона, не жадаючага бачыць у чальца NATO расейскую ваенную тэхніку.

У лістападзе прэзідэнт ЗША Дональд Трамп і турэцкі лідар Рэджэп Таіп Эрдаган на супольнай прэс-канферэнцыі ў Вашынгтоне паведамілі, што даручылі міністрам распрацаваць захады для ўрэгулявання пытання пра закупкі С-400 «Трыумф» Анкарой.

У кастрычніку кіраўнік Расабаронэкспарта Аляксандр Міхееў заявіў, што Турцыя атрымала ўсе элементы комплексаў С-400 «Трыумф» і абмяркоўвае з Расеяй дадатковыя пастаўкі.