У Нямеччыне спрасцілі працэдуру найму работнікаў з Беларусі

У Нямеччыне знялі абмежаванне пры найме работнікаў з трэціх краін.

У Нямеччыне спрасцілі працэдуру найму работнікаў з трэціх краін. У чэрвені 2019 года быў прыняты адпаведны закон аб іміграцыі спецыялістаў, які ўвайшоў у дзеянне ў сакавіку 2020 года, піша tut.by cа спасылкай на дзелавое інтэрнэт-выданне ubr.ua. Асноўнае новаўвядзенне новага закона: нямецкія працадаўцы змогуць наймаць замежнікаў, у тым ліку з краін - несябраў ЕЗ, адразу ж, па меры неабходнасці, а не чакаць пэўны тэрмін. Самі работнікі змогуць прыязджаць у Нямеччыну на пошук працы. Але спачатку трэба будзе пацвердзіць: дыпломы, веданне мовы, наяўнасць грашовых сродкаў для пражывання.

Скасавалі чаргу

Цяпер рабочыя з Беларусі, Украіны, Расеі і іншых краін могуць прэтэндаваць на працу ў Нямеччыне толькі ў парадку 3-й чаргі. Спачатку працадаўца абавязаны шукаць працоўную сілу сярод немцаў. Калі пошукі не ўвянчаліся поспехам, прапанаваць працу могуць грамадзянам з ЕЗ. І толькі калі і такога адмыслоўца не адшукаюць, то дадуць дазвол на пошук у іншых краінах.

Выключэнне складаюць хіба што высакакласныя IT-спецыялісты, у якіх афіцыйны працоўны стаж ад 3 гадоў і заробак не ніжэй за 4020 еўраў у месяц. Іх цяпер могуць наймаць без геаграфічных абмежаванняў.

Пошукі кваліфікаваных кадраў з іншых галін доўжацца, як правіла, не менш за тры месяцы. Але ўжо з сакавіка 2020 года нямецкі працадаўца зможа адразу браць на працу таго, каго захоча, - замежніка або немца. Але ў законе ўтрымліваецца прадпісанне, згодна з якім пры змене сітуацыі на рынку працы такая першачарговая праверка можа быць адноўленая.

У рэгіёнах возьмуць свае законы

Нямеччына з'яўляецца федэратыўнай дзяржавай, дзе парламент краіны, Бундэстаг, прымае законы, якімі задаецца канва тых ці іншых аспектаў жыцця краіны. Далей у адпаведнасці з гэтымі законамі свае заканадаўчыя акты прымаюць у асобных федэральных землях.

Яны прымаюць свае законы ў рамках прынятага раней агульнанацыянальнага. Таму ў рэальнасці новая схема прыцягнення працоўных мігрантаў з краін, якія не ўваходзяць у ЕЗ, запрацуе ў розных землях Нямеччыны па-рознаму і ў розны час. Хутчэй за ўсё, кажуць эксперты, асобныя законы распрацуюць і імплементуюць таксама вясной 2020 года.

Асноўны закон закліканы спрасціць наём на працу, перш за ўсё, кваліфікаваных спецыялістаў з трэціх краін, у якіх на гэты момант маюць патрэбу нямецкія прадпрыемствы. «Пад гэтую катэгорыю трапляюць спецыялісты з кваліфікаванай прафесійнай адукацыяй, а таксама выпускнікі вышэйшых навучальных устаноў і выпускнікі спецыялізаваных каледжаў», - распавёў UBR.ua прэзідэнт Усеўкраінскай асацыяцыі кампаній у міжнародным працаўладкаванні Васіль Васкабойнік.

Спецыялістамі ў Нямеччыне лічацца замежнікі, якія:

скончылі ў Нямеччыне спецыялізаваную навучальную ўстанову і атрымалі прафесійную адукацыю або прафесійную кваліфікацыю, альбо іх адукацыю эквівалентная нямецкай кваліфікаванай прафесійнай адукацыі;

маюць нямецкую вышэйшую адукацыю, або іх адукацыя можа быць прызнаная або супастаўная з нямецкай вышэйшай адукацыяй.

У той жа час розныя зямлі змогуць карэктаваць свае ўнутраныя законы і аслабіць патрабаванні да суіскальнікаў, зыходзячы са сваіх патрэб.

Якія абмежаванні застануцца

Неабходнасць атрымліваць візу для навучання і пошуку працы па-ранейшаму застаецца.

Iншаземец абавязаны абгрунтаваць, што ў яго ёсць сродкі да існавання на час свайго знаходжання. Гэта ж тычыцца і сябраў яго сям'і.

Кандыдаты старэйшыя за 45 гадоў павінны зарабляць штомесяц як мінімум 3685 еўраў або мець належнае пенсійнае забеспячэнне.

Праверка эквівалентнасці кваліфікацыі і праверка ўмоў працы застаюцца асноватворнымі для доступу да рынку працы. Гэта неабходна для забеспячэння належнай аплаты працы новых спецыялістаў і прадухілення «дэмпінгу заробку».

Асноўны канкурэнт Нямеччыны ў пошуку працоўнай сілы - Польшча. Па прагнозах экспертаў, прынамсі 500 тысяч работнікаў, у тым ліку замежных, могуць памяняць польскага працадаўцу на нямецкага. Паводле ацэнак польскага боку, ад 30% да 50% украінцаў, якія працуюць у Польшчы, хочуць пераехаць у Нямеччыну.

У Польшчы штогадовы недабор складае парадку 150-200 тысяч работнікаў. У Нямеччыне сітуацыя куды больш жаласная: кожны год незапатрабаванымі застаюцца прыкладна за 1,8 млн працоўных месцаў. Нямеччына з'яўляецца вялікай краінай, з насельніцтвам больш за 80 млн чалавек, што больш чым удвая пераўзыходзіць польскае. Таму і патрэба ў працоўных руках там вышэйшая.

У Нямеччыне патрэбныя самыя разнастайныя спецыялісты, але больш за ўсё: кваліфікаваныя рабочыя, медсёстры, работнікі сельскай гаспадаркі, работнікі сферы абслугоўвання. Сярэднія заробкі ў такіх спецыялістаў стартуюць ад 1600 да 2000 еўра ў месяц. У той жа Польшчы, напрыклад, на аналагічныя пасады прапануюць блізу 550 еўра. Але і жыццё ў Нямеччыне даражэйшае. Выдаткі на жыллё, пражытак будуць прыкладна на 30% вышэйшымі. Але больш высокія заробкі з лішкам перакрываюць гэтыя траты.