Справа «галоўнага што да афшораў»: як менская фірма ўтаіла даход на мільёны даляраў

Прадпрыемства абслугоўвала 500 кампаній-нерэзідэнтаў афшорных зон.

Дэпартамент фінансавых расследаванняў агучыў падрабязнасці справы затрыманага ў жніўні «галоўнага што да афшораў», спецыяліста ў сферы падатковага планавання і міжнароднага карпаратыўнага структуравання, кіраўніка партнёра юрфірмы «Калегія» Ігара Стуканава, паведамляе tut.by.

- У рамках процідзеяння неабгрунтаванаму пасярэдніцтву, а таксама злачынствам у эканамічнай сферы Дэпартаментам фінансавых расследаванняў Камітэта дзяржкантролю супольна са Следчым камітэтам выяўленыя факты ўхілення ад выплаты сум падаткаў дырэктарам таварыства з дадатковай адказнасцю (г. Менск) у асабліва значнай суме, - паведаміў намеснік начальніка аддзела ДФР КДК Юрый Кардымон. У ДФР не пацвердзілі і не зняпраўдзілі, што гаворка ідзе пра Стуканава, але паводле інфармацыі крыніцы tut.by і з іншых акалічнасцяў справы, гэта менавіта так.

ДФР устанавіў, што таварыства заніжала прыбытак, атрыманы ад рэалізацыі паслуг, у сферы міжнароднага карпаратыўнага права ў пытаннях аптымізацыі падатковай нагрузкі праз замежныя кампаніі, а таксама рэгістрацыі і абслугоўвання афшора. Атрыманы прыбытак паступаў на разліковыя рахункі падкантрольнай замежнай арганізацыі (зарэгістраваная ў Гібралтары) і ва ўліку супольнасці не паказваўся.

Паводле наяўнай інфармацыі ДФР, за 2011-2018 гады сума ўтоенага прыбытку ад рэалізацыі ў Беларусі паслуг склала не менш як 3,5 млн даляраў. Таварыства занізіла падатковую базу па «спрошчанай схеме» і не заплаціла падатак. Па факце ўхілення ад выплаты сум падатку ў асабліва значнай суме Следчы камітэт пачаў крымінальную справу на падставе ч.2 арт.243 Крымінальнага кодэкса.

Падазраванымі ў крымінальнай справе прызнаныя дырэктар і былы заснавальнік таварыства, якія добраахвотна кампенсавалі папярэдне пэўную суму нявыплачанага падатку ў суме 170 тысяч рублёў. Паводле справы канфіскаваныя дакументы, пячаці кампаній-нерэзідэнтаў, кампутарная тэхніка і іншыя носьбіты інфармацыі, якія ўтрымліваюць звесткі аб такой дзейнасці падазраванымі. Таксама знойдзеная і канфіскаваная замежная валюта на агульную суму 135 тысячаў даляраў. На маёмасць падазраваных накладзены арышт.

Акрамя таго, устаноўленыя асобы, якія карысталіся паслугамі таварыства, а таксама яго дачыненне да абслугоўвання і рэгістрацыі не менш чым 500 кампаній-нерэзідэнтаў афшорных зон. Органы фінансавых расследаванняў Камітэта дзяржкантролю правяраюць магчымыя парушэнні заканадаўства суб'ектамі гаспадарання, выкарыстаўшы рэквізіты замежных кампаній, у тым ліку для дакументальнага афармлення гаспадарчых аперацый у набыцці і рэалізацыі тавараў, работ і паслуг для незаконнай мінімізацыі сум падатковых абавязацельстваў.

Як раней паведамляў tut.by, Стуканава затрымалі 12 жніўня 2019 года. На сайце кампаніі Стуканаў пазіцыянуе сябе як «вядучы спецыяліст». Суразмоўцы tut.by адклікаюцца пра яго, як пра аднаго з самых вядомых на рынку спецыялістаў аб афшорах.