Мытнікі: Забылі выключыць рэгістратар на мяжы? Рыхтуйцеся да штрафу

Пералік дзеянняў, якія забараняецца выконваць у пунктах пропуску.

А вы ведалі, што за нявыключаны на мяжы аўтамабільны відэарэгістратар могуць аштрафаваць? Гомельская мытня днямі нагадала пра рэжымныя правілы ў пунктах пропуску праз мяжу, піша abw.by.

Асобна мытнікі звярнулі ўвагу на такую забарону, як вядзенне фота- і відэаздымкі. "Многія аўтаўладальнікі ўсталёўваюць у транспартных сродках відэарэгістратары. Аднак для таго, каб не парушыць закон, які забараняе ў пунктах пропуску ажыццяўляць фота- і відэаздымку, варта не забываць абавязкова выключыць відэарэгістратар да ўезду ў пункт пропуску. За парушэнне ўстаноўленых правіл вінаватыя асобы прыцягваюцца да адміністрацыйнай адказнасці", - паведамілі на мытні.

Гомельскай мытняй у 2019 годзе за відэаздымку з выкарыстаннем відэарэгістратараў да адміністрацыйнай адказнасці паводле ч.1 ст.23.32 КоАП РБ прыцягнута 105 фізічных асоб.

Правы і абавязкі фізічных асоб, якія знаходзяцца ў пункце пропуску, вызначаныя арт.43 Закона РБ ад 21 ліпеня 2008 года № 419-З "Аб Дзяржаўнай мяжы Рэспублікі Беларусь". У гэтым артыкуле пералік дзеянняў, якія забараняецца выконваць у пунктах пропуску, сярод якіх: вядзенне фота- і відэаздымкі; вядзенне размоў праз мабільныя сродкі сувязі, якія перашкаджаюць ажыццяўленню памежнага ды іншага тыпу кантролю; пакіданне грашовых сродкаў у дакументах, што падаюцца для праверкі ды іншыя.