Віцэ-прэзідэнт ЗША сустрэўся з Эрдаганам

Майк Пэнс і Майк Памэа прыбылі з экстраным візітам у Турцыю.

У Анкары праходзіць сустрэча прэзідэнта Турцыі Раджэпа Эрдагана з віцэ-прэзідэнтам ЗША Майкам Пэнсам. Пэнс разам з дзяржсакратаром Майкам Пампэа прыбылі ў Турцыю з экстраным візітам, каб паспрабаваць пераканаць Эрдагана спыніць ваенную аперацыю на поўначы Сірыі, паведамляе «Радыё Свабода».

Сам Эрдаган раней скептычна ацэньваў місію амерыканскіх прадстаўнікоў. Ён нават казаў, што не сустрэнецца з імі, хоць пазней змяніў свае планы. Турэцкі прэзідэнт таксама сцвярджаў, што не баіцца ўзмацнення жорсткасці санкцый з боку ЗША. Неабходнасць аперацыі супраць сірыйскіх курдаў ён апраўдвае барацьбой з тэрарызмам.

У чацвер стала вядома пра ліст, які Трамп накіраваў Эрдагану 9 кастрычніка - дзень пачатку турэцкай аперацыі. У ім ён у вельмі адкрытых выразах заклікае Эрдагана адмовіцца ад выкарыстання сілы ў Сірыі. «Не будзьце дурнем, не стварайце з сябе крутога хлопца» - піша, дарэчы, Трамп. Стылістыка ліста выклікала крытыку апанентаў прэзідэнта ЗША, а ў адміністрацыі Эрдагана заявілі, што адправілі дакумент «у смеццевы кошык».

Прэзідэнт Трамп, з аднаго боку, крытыкуе аперацыю Турцыі, з другога - абараняе сваю пастанову вывесці амерыканскія войскі з поўначы Сірыі і не надаваць курдам дапамогі. Большасць чальцоў Кангрэса не згодныя з гэтай пастановай Трампа.

Турэцкая аперацыя прадаўжаецца ўжо больш за тыдзень. За гэты час Турцыі і яе хаўруснікам з ліку сірыйскіх апазіцыянераў удалося ўзяць пад кантроль частку тэрыторыі ля мяжы. Курды ж, у сваю чаргу, падпісалі пагадненне з афіцыйным Дамаскам і перадалі пад кантроль сірыйскіх вайскоўцаў шэраг гарадоў, каб абараніць іх ад турэцкага наступу.