Даляру прадказалі 25 гадоў бязмежнай улады

Эксперты цэнтрабанкаў мяркуюць, што даляр застанецца галоўнай рэзервовай валютай.

Большасць цэнтральных банкаў ва ўсім свеце чакае, што даляр будзе «непадзельна панаваць» яшчэ 25 гадоў. Пра гэта Bloomberg піша са спасылкай на інвестыцыйную кампанію UBS Asset Management, якая апытала адказных за рэзервы мэнэджараў 30 рэгулятараў, паведамляе Forbes.

Блізу 66% мэнэджараў мяркуюць, што даляр застанецца пераважнай рэзервовай валютай цягам наступных 25 гадоў. На амерыканскую валюту ў другім квартале прыпадала больш за 61% валютных рэзерваў цэнтрабанкаў, паказвае Міжнародны валютны фонд (МВФ). Агульная сума рэзерваў складае $ 11,7 трлн, піша Bloomberg.

«Дамінаванне даляра ў глабальных рэзервах (сярэдняя дзель большая за 60% цягам апошніх 25 гадоў) было сталай рысай кіравання валютнымі рэзервамі», – падкрэслілі аналітыкі UBS Масіміліана Кастэлі і Філіп Салман. – Гэта асабліва нечакана таму, што здагадкі пра непазбежную смерць даляра ў апошнія дзесяцігоддзі сталі паўтарацца рэгулярна».

Пры гэтым нейкую дзель у даляра ў структуры рэзерваў забярэ кітайскі юань, вынікае з вынікаў даследавання. 38% рэспандэнтаў мяркуюць, што праз чвэрць стагоддзя юань стане такой самай важнай рэзервовай валютай, як даляр ці еўра. На еўра, мяркуючы з звестак МВФ, у другім квартале гэтага года прыпадала больш за 20% рэзерваў.