Незалежныя эксперты раскрытыкавалі пастанову расейскіх уладаў пра шамана Габышава

Праваабаронцы апавялі пра стратэгію абароны шамана.

У незалежнай экспертызе, праведзенай на просьбу адвакатаў шамана Аляксандра Габышава, паставілі пад сумнеў цэлы шэраг высноваў амбулаторнага "экспрэс-абследавання", зробленага ў псіхіятрычным дыспансеры Якуцка, куды шамана даставілі адразу пасля затрымання ў канцы верасня. Пра гэта ў чацвер, 17 кастрычніка паведаміў "Нямецкай хвалі" праз тэлефон Аляксей Пранішнікаў – каардынатар арганізацыі "Праваабарона Паштоўкі", якая падала шаману Габышаву двух адвакатаў для абароны ў крымінальнай справе пра экстрэмізм.

Паводле словаў праваабаронцы, незалежныя эксперты раскрытыкавалі высновы спецыялістаў, якія абследавалі Габышава амбулаторна, пра тое, што шаман ўяўляе з сябе пагрозу для сябе і навакольных і мае патрэбу ў змяшчэнні ў псіхалагічны дыспансер для лячэння.

Незалежныя эксперты не ўбачылі ў паводзінах Габышава агрэсіі

"Незалежныя эксперты не ўбачылі ў паводзінах шамана Габышава ніякай агрэсіі і выказалі здагадку, што выснова пра неабходнасць ягонай ізаляцыі для стацыянарнага лячэння з вялікай дзеллю верагоднасці была зробленая сітуацыйна", – падкрэслівае Пранішнікаў. Сам ён мяркуе, што ізаляцыя Габышава ў дыспансеры была б зручная ўладам, паколькі з'яўленне шамана ў Бураціі, відавочна, спрыяла ўзмацненню грамадскіх хваляванняў ва Улан-Удэ.

"Абгрунтаванне рэкамендацыі прымусовага лячэння ў стацыянары спецыялізаванага тыпу абапіраецца, як гэта добра відаць з высновы экспертаў, не столькі на заявы і дзеянні самога Габышава, колькі на выкліканы імі маштабны грамадскі рэзананс. Таму важна падкрэсліць, што ў кампетэнцыі псіхіятраў толькі псіхапаталагічная небяспека. Але ні ў гісторыі жыцця Габышава, ні ў амбулаторнай СПЭ (судова-псіхіятрычнай экспертызе. – Рэд.), ні ў звестках нашага даследавання няма ніякіх прыкметаў, якія дазваляюць казаць пра ягоную небяспеку для сябе або іншых асобаў", – цытуе Пранішнікаў вытрымку з высновы незалежных экспертаў.

Стратэгія абароны шамана Габышава

Паводле словаў праваабаронцы, наступным крокам адвакатаў стане хадайніцтва пра правядзенне стацыянарнага абследавання Аляксандра Габышава, як мяркуецца, у Нацыянальным медыцынскім даследчым цэнтры псіхіятрыі і наркалогіі імя Сербскага ў Маскве. "Улічваючы вынікі незалежнай экспертызы, мы ставім перад сабой мэту зняць рызыку змяшчэння яго ў стацыянар і ўжывання да яго прымусовых захадаў медыцынскага характару", – указаў Пранішнікаў.

Пасля гэтага абарона Габышава плануе правесці лінгвістычную экспертызу, якая дапамагла б даказаць, што ў выказваннях шамана не ўтрымлівалася заклікаў да экстрэмісцкай дзейнасці, а таксама рэлiгiязнаўчую экспертызу, якая пацвердзіла б, што нейкі абрад выгнання дэманаў, які ён, відавочна, збіраўся правесці ў Маскве , – гэта толькі частка ягонай асаблівай веры і шаманскай практыкі, за якой не хаваўся намер нанесці каму-небудзь шкоду.

"Паколькі шаман Габышаў стаў вядомай медыйнай фігурай, абвінавачванне, напэўна, не наважылася б асудзіць яго да вельмі лютай кары, – мяркуе Пранішнікаў. – Таму следства выбрала найбольш просты шлях – ягоную ізаляцыю ў дыспансеры, якая адначасова паказала б прыхільнікам шамана, што той, за кім яны рушылі, – псіхалагічна нездаровы чалавек".

Сам Габышаў у тэлефоннай размове з журналістамі ў сераду заявіў, што ўважае сябе "здаровым і разумным чалавекам" і не прызнае вынікі медыцынскіх абследаванняў, згодна з якімі ён аб'яўляецца няўпамятным.