Беларус Сцяпан Фалькоўскі стаў найлепшым хакеістам тыдня ў ECHL
- 16.10.2019, 10:27
- 5,944
Малады хакеіст з'яўляецца найлепшым бамбардзірам сярод абаронцаў лігі.
Беларускі абаронца "Ален Амерыканс" Сцяпан Фалькоўскі прызнаны найлепшым гульцом тыдня ў ECHL, паведамляе "Прэсбол".
На старце сезону ягоная каманда перамагла абодва матчы і займае трэцяе месца ў Заходняй канферэнцыі ECHL. Фалькоўскі ў гэтых дзвюх гульнях набраў 4 (1 + 3) балы і з'яўляецца найлепшым бамбардзірам сярод усіх абаронцаў лігі, а таксама самым выніковым гульцом "Ален Амерыканс".
Гэта быў выдатны тыдзень для нас, – цытуе hockey.by словы Фалькоўскага афіцыйнаму сайту клуба. – У нас класная каманда, сёлета атмасфера ў распранальні моцна адрозніваецца ў лепшы бок. Усе старанна працуюць адзін за аднаго. Для мяне вялікі гонар стаць гульцом тыдня, але я тут для таго, каб дапамагчы маёй камандзе перамагаць.
12 кастрычніка Сцяпан адзначыўся галявой перадачай у авертайме матчу з "Рэпід Сіці Раш" (3:2 АД), а на наступны дзень закінуў шайбу ў меншасці і паўдзельнічаў у двух галах, уключаючы пераможны, у сустрэчы з "Талсы Ойлерс" (5:4). Таксама Фалькоўскі зарабіў паказнік карыснасці +3 і ні разу яшчэ не выпраўляўся ў бокс для штрафнікоў.