Леанід Заіка: План ліквідацыі беднасці трэба аддаць на публічнае спаленне

На думку эканаміста, гэта павінен зрабіць «наш любімы паэт Гуцарыеў».

Кіраўнік Аналітычнага цэнтра «Стратэгія» Леанід Заіка выказаўся пра прыняты ўрадам план развіцця адсталых рэгіёнаў. У дакуменце, выкананне якога, на думку ўладаў, павінна ліквідаваць беднасць у рэгіёнах, прапісаныя 282 праекты агульным аб'ёмам інвестыцый больш за 10 млрд рублёў. Ільвіная доля гэтых праектаў (7,7 млрд рублёў) прыпадае на калійную галіну - аб'екты ў Петрыкаўскім і Любанскім раёнах, піша «Салідарнасць».

- Трэба аддаць гэты дакумент на публічнае спаленне. І яго павінен ажыццявіць наш любімы паэт Гуцарыеў, - заявіў Леанід Заіка ў праграме «Примус».

Як варыянт эканаміст прапанаваў аддаць гэты дакумент на рэцэнзаванне начальніку КДК Леаніду Анфімаву.

- Можа быць, узяць некалькі хлопцаў з кайданкамі, і дэпартаменту фінансавых расследаванняў па аўторках з 10 раніцы да абеду хадзіць па калідорах урада, круціць на пальцы кайданкі і пытацца «Хлопцы, а ў вас усё ў парадку? Скажыце, хто там Гуцарыеву прапанаваў за такія бабкі?»