Die Welt: Барыса Джонсана могуць зрынуць ужо на наступным тыдні

Нямецкае выданне падае тры сцэнары развіцця падзей.

«Лізавета II прадставіла ў брытанскім парламенце праграму ўрада Барыса Джонсана - якога ўжо на наступным тыдні могуць зрынуць прапановай аб вынясенні вотуму недаверу». Нямецкае выданне Die Welt (пераклад - inopressa.ru) падае тры сцэнары развіцця падзей.

«Амаль на працягу дзесяці хвілін каралева зачытвала 26 законапраектаў урада Барыса Джонсана, які, як гаварылася ва ўступе, «хоча выкарыстоўваць шанцы, якія абяцаюць выхад з ЕЗ», - паведамляе журналістка Штэфані Больцан. - Пры гэтым абсалютна незразумела, калі і як каралеўства пакіне Еўрапейскі звяз. Урад Джонсана цяпер усё роўна не мог бы правесці новыя законы праз Палату абшчын, бо для большасці яму не стае больш за 40 галасоў».

«Як доўга прэм'ер наогул будзе заставацца прэм'ерам, таксама стаіць пад пытаннем. Магчыма, апазіцыя ўжо на наступным тыдні выступіць з прапановай аб вынясенні вотуму недаверу і цалкам можа перамагчы. Таму зачытаны каралевай заканадаўчы парадак дня быў, з пункту гледжання Джонсана, перш за ўсё пачаткам перадвыбарчай кампаніі».

«Давайце ж зробім «Брэкзіт», - так гучыць «бязлітасна просты лозунг» Барыса Джонсана. Але ці зможа ён сапраўды ажыццявіць выхад Вялікабрытаніі з ЕЗ да 31 кастрычніка?

«Угода магчымая, яна магчымая ў гэтым месяцы ці нават на гэтым тыдні, - заявіў у панядзелак у Люксембургу ірландскі міністр замежных спраў Сайман Коўна. - Але пакуль мы гэтага не дасягнулі». Перамовы, якія адбыліся ў Брусэлі на выходных, не прынеслі прарыву. Калі, нягледзячы на маўчанне аб дэталях спрэчкі, не будзе намечаная ўгода, Джонсану давядзецца прасіць у Еўрапейскай рады падаўжэння тэрміну «Брэкзіту» да 31 студзеня 2020 года. «У перадвыбарнай кампаніі гэта было б хваравітым для Джонсана, бо ён абяцаў любой цаной выйсці з ЕЗ у канцы кастрычніка. Пацешыцца, у сваю чаргу, мог бы Найджэл Фараж і ягоная «Партыя «Брэкзіту», якія паводзяць сябе як адзіныя сапраўдныя праціўнікі ЕЗ», - гаворыцца ў артыкуле.

Неабходнасць дасягнуць адзінства гняце як Лондан, так і Дублін, працягвае выданне. Урад Ірландыі зацікаўлены ў спарадкаваным «Брэкзіце», адсутнасць угоды нанесла б моцны ўдар па яе эканоміцы. На мінулым тыдні прэм'ер-міністр Леа Варадкар пасля сустрэчы з Джонсанам аптымістычна адзначыў, што «бачыць шлях да дасягнення пагаднення».

«На сваёй сустрэчы ў чацвер кіраўнікі дзяржаў і ўрадаў ЕЗ маглі б прынамсі тэхнічна зацвердзіць пагадненне. Джонсан ужо прызначыў на суботу пазачарговае пасяджэнне Палаты абшчын».

«Там ён хоча правесці галасаванне аб заключанай з ЕЗ папярэдняй дамоўленасці. Хоць у яго і няма большасці, а значная частка апазіцыі хоча перашкодзіць «Брэкзіту» з дапамогай парламенцкай блакады, у Лейбарысцкай партыі ёсць шмат дэпутатаў, якія хочуць пакласці канец драме «Брэкзіту» і маглі б пагадзіцца з Джонсанам. Калі ён пераможа на галасаванні, ён зможа аб'явіць аб фармальным «Брэкзіце».

«Калі ж Джонсану не ўдасца заключыць ні паўнавартаснай, ні папярэдняй угоды, ён можа сысці ў поўную канфрантацыю. «Я б аддаў перавагу ляжаць мёртвым у канаве, чым прасіць аб адтэрміноўцы «Брэкзіту», - гучыць яго клятва».

Калі кансерватар адмовіцца ад падаўжэння тэрміну, «дэпутаты і іншыя групы зацікаўленых звернуцца ў суды ў сувязі з тым, што кіраўнік урада супрацьзаконна ігнаруе даручэнне парламента. Нават калі Джонсан прайграе ў гэтай новай юрыдычнай бітве, гэта прынясе яму павагу мільёнаў брытанцаў, што стаміліся ад «Брэкзіту» і забяспечыць галасамі на наступных выбарах», - рэзюмуе Die Welt.