Беларускія ўлады вызвалілі расейку, якую патрабуюць выдаць ЗША

Ганна Багачова знаходзіцца пад амерыканскімі санкцыямі.

Як паведаміла пасольства Расеі ў РБ у сваім twitter-акаўнце, Ганна Багачова цяпер знаходзіцца на волі. Паводле звестак РІА «Новости» яна была затрыманая ў менскім гатэлі пазаўчора, беларускія праваахоўныя органы гэтую сітуацыю не каментуюць, піша tut.by.

«Расейская грамадзянка Ганна Багачова, пра «сітуацыі» з затрыманнем якой праваахоўнымі органамі Беларусі праінфармаваў шэраг СМІ, у размове з супрацоўнікам консульскай службы Пасольства Расеі ў Рэспубліцы Беларусь паведаміла, што знаходзіцца на свабодзе», - піша ў Twitter амбасада Расеі ў РБ.

Даслоўна за паўгадзіны да з'яўлення гэтай інфармацыі пасольства паведамляла: затрыманне Ганны Багачовай знаходзіцца «пад увагай консульскага аддзела». Ніякіх падрабязнасцяў больш не было. Беларускія праваахоўныя органы не каментавалі затрыманне расейкі Ганны Багачовай, якая трапіла пад санкцыі ЗША.

Як паведамляла раней агенцтва РІА «Новости», Багачову затрымалі на запыт ЗША пазаўчора, блізу 22 гадзін, у адным з гатэляў. Як тлумачыць «Медуза», Ганна Багачова ў 2018 годзе трапіла пад санкцыі ЗША як супрацоўніца «Агенцтва інтэрнэт-даследаванняў», якое называюць «фабрыкай троляў». Раней яна была актывісткай нацыяналістычнага «Рускага ладу».

Праз копію аддаленага акаўнта «Вконтакте» журналісты «Радыё Свабода» высветлілі, што Багачова была вядомая ў нацыяналістычных колах пад імем Ганна Трыга.

Нагадаем, пасля выбараў у 2016 годзе ЗША абвінавацілі Маскву ва ўмяшанні ў прэзідэнцкую кампанію, зрэшты, у кібератаках на серверы Дэмакратычнай партыі. Шэраг амерыканскіх палітыкаў, у першую чаргу прадстаўнікоў Дэмакратычнай партыі, западозрылі прэзідэнта Дональда Трампа ў змове з Расеяй. З гэтай нагоды было праведзенае расследаванне спецпракурора Роберта Мюлера, вынікі якога былі апублікаваныя ў красавіку 2019 года. Каманда спецпракурора не выявіла змовы, аднак пацвердзіла меркаванае «ўмяшанне Расеі».

Роберт Мюлер выставіў 13 расейцам і тром кампаніям з Расеі абвінавачванні паводле артыкула «Змову супраць ЗША» і «Махлярства», у іх ліку - Ганне Багачовай. Гэтыя людзі трапілі пад санкцыі Мінфіна ЗША.