Якіх ільготаў бракуе беларускім пенсіянерам?

Вынікі апытання кажуць самі за сябе.

Сайт tut.by папрасіў чытачоў расказаць пра тое, якіх ільготаў для пенсіянераў нам бракуе.

Паводле інфармацыі на раніцу 15 кастрычніка, у апытанні прагаласавала амаль 3000 чалавек. З іх 61% мяркуе, што ў Беларусі трэба ўвесці ільготы на лекі, 43% - вярнуць ільготы на праезд, 26% - увесці ільготы на санаторна-курортнае лячэнне, 21% - больш субсідаваць «камуналку» (у апытанні можна было выбраць некалькі варыянтаў адказу). Яшчэ 26% мяркуюць, што існых ільгот дастаткова, але трэба павялічыць суму пенсій. А 4% адказалі, што новыя ільготы ўводзіць не трэба, і больш за тое - варта было б прыбраць і ўжо існыя.

Многія чытачы скарысталіся опцыяй «напісаць свой варыянт адказу» і прапанавалі свае варыянты ільгот для пенсіянераў. Для зручнасці мы падзялілі іх на групы.

Здароўе: зубныя пратэзы і заняткі спортам

Большасць удзельнікаў апытання ў прынцыпе выказаліся на карысць ільгот, якія так ці інакш звязаныя са здароўем. У дадатак да ільгот на лекі і на туры на санаторна-курортнае лячэнне яшчэ дзесяць чалавек паказалі, што, на іх думку, дзяржава павінна аплачваць пенсіянерам пратэзаванне зубоў (як прапануе адзін з іх, хоць бы з самага таннага матэрыялу - пластмасы).

Некаторыя чытачы мяркуюць, што ільготы «на здароўе» - гэта, у прынцыпе, адзіныя неабходныя льготы.

- Трэба пакінуць і ўвесці толькі ільготы, звязаныя з захаваннем здароўя: аплата лекаў, медыцынскія паслугі, наведванне спартова-аздараўленчых устаноў, - выказаўся адзін з удзельнікаў апытання.

А іншыя прапаноўвалі ўвесці такія ільготы з магчымасцю іх манетызаваць.

- Паводле пратаколаў лячэння захворванняў падлічыць сярэдні кошт і дадаць да пенсіі: хочаш - лекі, хочаш - апельсіны, - прапануе ўдзельнік апытання.

Грошы: манетызацыя ільгот і падвышэнне пенсій усім, хто працуе на пенсіі

Акрамя ільгот на ахову здароўя, многія выказваліся на карысць грошай, якія пенсіянеры змаглі б выдаткаваць на сваё меркаванне. Сем чалавек паказалі, што выступаюць за манетызацыю ільгот, як у Расеі, калі замест ільготы пенсіянер можа атрымаць тую грашовую суму, якая закладзеная на яе ў бюджэце.

Некаторыя ўдзельнікі апытання прапаноўвалі павялічыць пенсіі, але з пэўнымі ўмовамі. Напрыклад, адна з ідэй - падвысіць пенсіі «тым, хто мае менш за 300 даляраў» (цяпер сярэднія працоўныя пенсіі па ўзросту складаюць 446,8 рубля, гэта 218 даляраў існым афіцыйным курсе).

Таксама чытачы прапаноўвалі павялічыць пенсію пенсіянерам, якія працуюць (магчыма, гаворка ідзе пра тое, што ў пенсіянераў, якія працуюць і атрымліваюць адначасова заробак і пенсію, дадатковы стаж ніяк не ўплывае на суму выплат у будучыні). А сустракаліся і ідэі перастаць выплачваць пенсіі працоўным пенсіянерам.

- Пенсіянер - хто ўжо не працуе, а хто працуе - гэта той, хто дасягнуў пенсійнага ўзросту, - пракаментаваў гэта адзін з чытачоў.

Іншыя ідэі: скасаваць плату за гурткі і вярнуць савецкія ўклады

У чытачоў было шмат іншых ідэй з нагоды таго, якія ільготы маглі б спатрэбіцца беларускім пенсіянерам. Вось некаторыя з іх:

«Дазволіць дзяржслужбоўцам працаваць і цалкам, як і ўсім астатнім, атрымліваць пенсію. Яны яе заслужылі!» (Пенсіянерам, якія працуюць, якія атрымалі пенсію за выслугу гадоў на дзяржслужбе, не плацяць пенсію, калі яны працуюць паводле працоўнай дамовы або займаюцца прадпрымальніцкай дзейнасцю. - заўв. рэд.)

«Трэба вярнуць грошы па ўкладах і страхоўках, якія былі да распаду СССР».

«Прыбраць плату за гурткі пенсіянерам у цэнтрах сацыяльнага абслугоўвання насельніцтва».

«Скасаваць дарожны падатак».

«Не падвышаць пенсійны ўзрост»

«Пенсію налічваць на падставе фактычна прапрацаваных гадоў і гадоў, выдаткаваных на выхаванне дзяцей (на кожнае дзіця ў асобнасці), а не ад фактычна атрыманага заробку. У першым выпадку заслугі на атрыманне больш высокай пенсіі большыя».

«Патрэбныя туры на адпачынак».

«Скасаваць ільготы за доўгажыхарства, бо гэта чарговы жэст. Так можна ўвесці ільготы за ЗЛЖ пенсіянера або захаванне прывабнай знешнасці».

«Патрэбная новая пенсійная сістэма, здольная даць чалавеку, які працаваў усё жыццё, годна хоць бы не жыць, а існаваць на пенсію».