Сабака Паўлава

Нарэшце тэрмін «пуцінізм» узаконяць.

Суркоў Уладзіслаў як сабака Паўлава. У таго пачыналася багатае слінавылучэнне ў прадчуванні ежы. У Суркова – багатае вывяржэнне пахвалаў на адрас Пуціна ў страху страціць сваё, хай і не самае зайздроснае цяпер месцейка ў Крамлі – памочніка прэзідэнта ў пытаннях сацыяльна-эканамічнага супрацоўніцтва з дзяржавамі СНД, Абхазіяй і Паўднёвай Асеціяй. З чутак, украінскі кірунак у яго цяпер актыўна адціскае экс-амбасадар у Беларусі, цяпер намеснік кіраўніка мэра Бабіч. І Суркоў, які маўчаў з лютага, пасля опуса пра доўгае кіраванне Пуціна, раптам заяўляе пра неабходнасць даследаваць яго дзейнасць. Для пачатку запусціць дыскусію палітолагаў пад рубрыкай «пуцінізм».

Брава, Слава! Нарэшце тэрмін пуцінізм узаконяць. Раней яго ўжывалі амаль выключна ў негатыўнай канатацыі. У шэрагу СМІ ён быў нават пад забаронай, як і словазлучэнне «пуцінскі рэжым». І вось цяпер, магчыма (Пяскоў супраць, яму не падабаецца слова «пуцінізм»), адкрыюцца нябачаныя раней абшары для думкі.

СерпомПо – за, цалкам і абсалютова. Раім Садоўнічаму, як рэктару галоўнай ВНУ краіны, адкрыць калі не факультэт, то хаця б аддзяленне навуковага пуцінізму. І ўвогуле, напярэдадні 20-годдзя першага абрання Пуціна прэзідэнтам (сакавік 2020) час брацца за справу па-сапраўднаму. І не толькі ў навуковым плане. Хоць выдаць ПЗТ У.У. Пуціна ў 55 тамах (не будзе хапаць тэксту – разбавіць малюначкамі) з аўдыя і відэаверсіямі – гэта святое.

Культура пакуль таксама завінавацілася. Мы, можа, не знаўцы, але акрамя салодзенькага фільма «Пацалунак не для прэсы» і ўспомніць няма чаго. Трэба тэрмінова запусціць кінацыкл «Пуцініяна»: «Пуцін у снежні», «Чалавечкі без стрэльбы» (другая назва – «Ветлівыя людзі»), «Зялёная папка» і г.д.

Ну і, вядома, хопіць гэтых шакаладна-мармеладна-гіпсавых пуціных і ўбогіх фота для кабінетаў правінцыйных чыноўнікаў. Даеш манументы – «Пуцін падымае Расею з каленяў»; карціны – «Пуцін выступае на XVIII з'ездзе “Адзінай Расеі”», «Пуцін забівае 10-ю шайбу». Ну і, музеі, вядома. Ад мемарыяльнага музея-кватэры да музея будучых відаў узбраенняў імя Пуціна. Для кітайскіх турыстаў экскурсійныя маршруты запусціць – «пуцінскімі сцежкамі».

Ды ці мала што можна прыдумаць для прасоўвання пуцінізму. Пачаць, дарэчы, трэба не з дыскусій, а з конкурсаў. СерпомПо – удзельнічае. Мы яшчэ ў лютым свой слоган прыдумалі. Чакаем гранту.

Тэлеграм-канал «Серпом По»