Фотафакт: Беларускія кіроўцы чамусьці прыкрываюць нумары

Бываюць вельмі арыгінальныя варыянты.

Некаторыя аўтамабілісты – вельмі сарамлівыя людзі, якія не любяць пазіраваць пры выблісках фотаапаратаў. А стыль кіравання неўнікнёна прыводзіць да таго, што на камеру не-не ды і трапішся, піша «Онлайнер». Сарамлівыя парушальнікі – класіка. І вось сёй-той зусім не супраць схаваць тое самае месца на сваёй машыне, паводле якога нескладана вызначыць кіроўцу. Як гэта зрабіць? О, бываюць вельмі арыгінальныя варыянты!

Якое месца некаторыя кіроўцы імкнуцца прыкрыць?

У = Р

На днях у Менску быў заўважаны BMW 7-Series (F01) з не зусім звычайным рэгістрацыйным знакам (прынамсі, заднім). Прыгледзьцеся да літараў: заўважылі падвох? Літара «B» на нумары нейкім дзіўным чынам сцерлася і ператварылася ў «Р».

Здараецца, што фарба на рэгістрацыйным знаку сціраецца занадта хутка. Бывала нават, што ў масы траплялі цэлыя бракаваныя серыі, якія «выліньвалі» пасля першай жа мыйкі. Але звычайна фарба з такіх няякасных нумароў злазіць больш-менш раўнамерна. У выпадку ж з BMW, здаецца, мела месца чараўніцтва. Неяк інакш растлумачыць настолькі акуратнае ператварэнне гэтай літары ў іншую не атрымліваецца.

Машына ў горадзе ўжо прымільгалася. Чытачы ахвотна дзеляцца фатаграфіямі і выказваюць здагадку пра рукатворнае ператварэнні рэгістрацыйнага знака. Цікава было б зірнуць на пярэдні нумар гэтага аўтамабіля – няўжо і там «B» ператварылася ў «Р»? Чыста выпадкова, зразумела.

У Дзяржаўтаінспекцыі пазіцыя ў гэтым пытанні цалкам акрэсленая: калі з рэгістрацыйнымі знакамі здарылася непрыемнасць або колеры страцілі насычанасць, трэба звярнуцца ў Паліграфічны цэнтр МУС на адрасе вул. Грушаўская, 7в. Там нумары заменяць. Прычым калі ў базе серыя сапраўды пазначаная як бракаваная, то замену вырабяць бясплатна.

Ці можна падфарбаваць нумар самому? Памятайце пра тое, што пры вытворчасці рэгістрацыйных знакаў на іх наносіцца адмысловае святлоадбіўнае пакрыццё, якое адпавядае вызначаным патрабаванням. Самому ўзнавіць такое пакрыццё не атрымаецца.

Фігавы лісточак

Прыкрыцца фігавым лістом – такі прыём стары як свет. Гэтай восенню ён, зрэшты, карыстаецца асаблівай папулярнасцю ў аўтамабільным асяроддзі.

Адзін з чытачоў запрыкмеціў у горадзе Volkswagen Polo з налепкай і плафонам таксі, а таксама апалым лісточкам, прыліплым да рэгістрацыйнага знака якраз на першай лічбе. Не выключана, што гэта выпадковасць і ніякага намеру няма. Можа ж лісцік, пралятаючы міма таксі, зачапіцца за нумарны знак і павіснуць, закрыўшы сабой «0» або «9».

– Як бы выпадкова лісцік прыляпіўся, – напісаў аўтар здымка.

Восень у самым разгары, лісця вакол дастаткова. Вось яшчэ адзін нахабна павіс на нумары BMW 7-Series. Зноў жа, не відаць, «0» гэта ці «9».

Да якіх наступстваў можа прывесці такі вось лісточак на нумары? Першае, што прыходзіць на розум, – прыборы фотафіксацыі. Выходзіць, калі такая машына перавысіць хуткасць і трапіцца на камеру, вызначыць нумар, а разам з ім і ўладальніка транспартнага сродку будзе цяжка?

У СЗАТ «Бяспечныя дарогі Беларусі» растлумачылі, што фатаграфія з рэгістрацыйным знакам, дзе немагчыма разабраць усе лічбы і літары, сапраўды можа быць «забракаваная». Вось толькі апошняе слова ўсё роўна застаецца за ДАІ. Дапусцім, на здымку аўтамабіль, які перавысіў хуткасць, але адна з лічбаў ягонага нумара не відаць праз лісцік. Фатаграфія будзе перададзеная кампетэнтнай асобе, якая і будзе прымаць пастанову пра далейшыя дзеянні. Вельмі можа быць, што машына ўсё роўна будзе распазнаная.

Заканадаўства

Дзяржстандарт (СТБ 914-99) вызначае тыпы рэгістрацыйных знакаў, а таксама тэхнічныя патрабаванні, што да іх прад'яўляюцца. Там, сярод іншага, паказана, як менавіта павінны быць устаноўленыя нумары на аўтамабілі.

Кіраванне транспартным сродкам з нечытэльным, нестандартным або ўстаноўленым з парушэннем абавязковых для выканання патрабаванняў тэхнічных нарматыўных прававых актаў у галіне тэхнічнага нармавання і стандартызацыі рэгістрацыйным знакам вынікуе папярэджанне або накладанне штрафу памерам да дзвюх базавых велічыняў (ч. 8 арт. 18.12 КаАП).

Забараняецца ўдзел у руху транспартнага сродку без усталяваных у прадугледжаных месцах рэгістрацыйных знакаў, транспартнага сродку, які мае сляды перайначвання або знішчэння рэгістрацыйных знакаў (п. 194.2 ПДР).

Кіраванне транспартным сродкам з загадзя схаваным, падробленым ці іншым чынам змененым рэгiстрацыйным знакам, ідэнтыфікацыйным нумарам кузава або шасi або без прысвоенага рэгістрацыйнага знака вынікуе накладанне штрафу памерам ад дзесяці да дваццаці базавых велічыняў (ч. 6 арт. 18.12 КаАП).

Падробка альбо знішчэнне ідэнтыфікацыйнага нумара, нумара кузава, шасі, рухавіка альбо падробка рэгістрацыйнага (нумарнога) знака транспартнага сродку ў мэтах эксплуатацыі або збыту транспартнага сродку, або збыт транспартнага сродку, кузава, шасі або рухавіка з такімі падробкамі караюцца штрафам, або арыштам, або абмежаваннем волі на тэрмін да двух гадоў, або пазбаўленнем волі на той жа тэрмін (ч. 1 арт. 381 КК).

Пярэкруты

Па-сапраўднаму дзіўная ідэя – перакуліць нумар. Ён усё роўна будзе чытаны на здымку, зробленым прыборам фотафіксацыі, але прывабіць увагу супрацоўнікаў ДАІ. Тым не менш перыядычна нашы чытачы бачаць аўтамабілі з рэгістрацыйнымі знакамі, усталяванымі дагары нагамі.

Адсутнасць матыву як такога наводзіць на думку, што гэта можа быць недарэчным жартам. Аднак кіроўцу гэта пагражае цалкам рэальнымі праблемамі. Памятаеце BMW 5-Series, якая ездзіла па Менску з перакуленым нумарам? Аўтамабіліст атрымаў за гэта штраф паводле ч. 8 арт. 18.12 КаАП.

Якія вашы намеры?

Мы пагаджаемся з тым, што ў жыцці адбываюцца дзіўныя рэчы. І лісток з дрэва ўдала прылятае на нумар, і лічбы з літарамі самі сабой сціраюцца – усё бывае. Але вядомыя выпадкі, калі кіроўцы свядома і вынаходліва хаваюць нумары сваіх машынаў. Верагодна, гэта патрэбна ім, каб пазбегнуць штрафаў за перавышэнне хуткасці. Хоць наўрад ці нехта паставіць лайк за такое імкненне да беспакаранасці.

Але і такія трапляюцца. Неяк на АЗС экіпаж ДАІ дагнаў матацыкл: інспектары заўважылі, што на матацыкле няма рэгістрацыйнага знака. Глядзіце відэа: паспелі заўважыць, калі нумар з'явіўся?

А адзін з самых рэзанансных прыёмаў, як хаваць нумар аўтамабіля, прадэманстраваў неяк кіроўца Nissan Navara. У ягонай машыне быў устаноўлены спецыяльны механізм, які круціў рамку з рэгістрацыйным знакам. Праязджаючы міма камеры фотафіксацыі, кіроўца мог актываваць прыладу, а потым, ад'ехаўшы на бяспечную адлегласць, зноў «перакуліць» нумар.

У абодвух выпадках ДАІ змусіла кіроўцаў да адказнасці. Інспектары не хаваюць, што праблема з прыхаванымі нумарамі існуе.

– Некаторыя кіроўцы наўмысна рыхтуюцца да руху з парушэннем хуткасных рэжымаў, пагражаючы тым самым небяспекай сабе і навакольным. Нумарныя знакі здымаюць, лічбы ці літары відазмяняюць або хаваюць, – адзначылі ў ДАІ. – Таму перыядычна праводзяцца мэтанакіраваныя рэйды для выяўлення такіх фактаў і змушэння кіроўцаў да адказнасці ў адпаведнасці з заканадаўствам.

Дапоўнена

Ужо пасля публікацыі адзін з чытачоў прапанаваў рэдакцыі фота, на якіх, паводле ягоных слоў, відаць якраз такі механізм, што пераварочвае рэгістрацыйны нумар. На аўтамабілі Mazda сапраўды ўсталяваныя нестандартныя нумарныя рамкі і спераду, і ззаду, да якіх, падобна, працягнутыя кабелі.