Банк Расеі перавёў 15% рэзерваў у юань і страціў $5 мільярдаў

Палітыка дэдалярызацыі дабралася да цэнтральнага банка РФ і ўдарыла па золатавалютных рэзервах краіны.

Палітыка дэдалярызацыі, абвешчаная вышэйшым расейскім кіраўніцтвам летась, дакацілася да цэнтральнага банка і ўдарыла па золатавалютных рэзервах краіны, паведамляе finanz.ru.

Банк Расеі ў рэкордных аб'ёмах распрадае даляры ЗША і скупляе юані, доля якіх у ЗВР за год падскочыла ў 147 разоў.

На пачатак ліпеня 2018 года ЦБ трымаў у юанях 14,7% ад рэзерваў, або 67 млрд даляраў, вынікае са штоквартальнай справаздачы рэгулятара.

Укладанні ў юань растуць у геаметрычнай прагрэсіі. У трэцім квартале мінулага года ЦБ купіў кітайскай валюты на 3,9 млрд даляраў, у чацвёртым - на 8 млрд, у першым квартале мінулага года дадаў у гульню яшчэ 11 млрд, а мінулай вясной, пасля чарговага раўнда ўзмацнення жорсткасці санкцый ЗША, правёў рэкордную закупку на 44 млрд даляраў.

Прытрымліваючыся ўстаноўцы на дэдалярызацыю, Банк Расеі зрабіў стаўку на Кітай, але рынак форэкс рушыў у процілеглы бок і прынёс Цэнтрабанку шматмільярдныя страты на курсавых розніцах.

Ужо ў канцы чэрвеня на фоне гандлёвай вайны КНР з ЗША юань пачаў імкліва таннець: калі ў першай палове года курс вагаўся блізу 2-летніх максімумаў паміж 6,2 і 6,4 юаня за даляр, то да пачатку верасня наблізіўся да 6,9 юаняў за даляр, а ў лістападзе ледзь не закрануў адзнаку ў 7 юаняў.

За ліпень-снежань укладанні ЦБ у юані абясцэніліся на 2,3%, або 1,5 млрд даляраў.

Калі ж улічваць сярэдні курс на перыяд актыўных пакупак цэнтрабанка, то страты дасягаюць 7,5%, ці 5 млрд даляраў.

Гэту страту не ўдалося перакрыць нават за кошт працэнтнага даходу па кітайскіх каштоўных паперах: ён склаў 3,2% гадавых або 2,1 млрд даляраў у грашовым выразе.

Пры кіраванні рэзервамі ЦБ вядзе палітыку дыверсіфікацыі, тлумачыла 18 кастрычніка кіраўніца цэнтрабанка Эльвіра Набіўліна.

Мэтай, з яе слоў, з'яўляецца «забяспечыць захаванасць» рэзерваў ва ўмовах рызык - «геапалітычных, эканамічных і фінансавых».