Вялікая форэкс-кампанія пакінула Беларусь праз два месяцы пасля рэбрэндынгу

Кампанія «Форэкс оптымум» абвясціла аб спыненні дзейнасці на пазабіржавым рынку Форэкс у Беларусі.

Адпаведная аб'ява змешчаная на сайце кампаніі.

«ТАА "Форэкс оптымум" просіць Вас закрыць усе адкрытыя пазіцыі да 16 студзеня 2019 года да 23:59 (уключна) уў сувязі з прыняццем пастановы аб спыненні дзейнасці форэкс-кампаніі. Усе абавязанні перад кліентамі будуць выкананы ў поўным аб'ёме ў адпаведнасці з дзейным заканадаўствам Рэспублікі Беларусь і ўнутранымі нарматыўнымі дакументамі кампаніі», - гаворыцца ў паведамленні.

Варта адзначыць, што «Форэкс оптымум» з'явіўся ў Беларусі ў лістападзе 2018 года пасля змены ўласніка ў «ТэлетрэйдБел». Незадоўга да гэтага ў Расеі абвясцілі ў вышук ўладальніка біржы TeleTrade. Нацыянальны банк уключыў кампанію «ТэлетрэйдБел» у рэестр форэкс-кампаній у траўні 2016 года.

У канцы 2018 года Цэнтральны банк Расеі ануляваў ліцэнзіі пяці форэкс-дылераў РФ, у тым ліку найбуйнейшых «Альпары Форэкс», «Тэлетрэйд Груп» і «Форэкс Клуб».

У адказе на запыт БелаПАН кампанія «Форэкс оптымум» патлумачыла, што прыняла пастанову аб зыходзе з Беларусі з некалькіх прычын.

Прадстаўнікі кампаніі адзначылі, што ў Еўразвязе на пачатку гэтага года ўвайшла ў дзеянне дырэктыва «Аб рынках фінансавых інструментаў», у сувязі з прыняццем якой магчымае істотнае ўзмацненне рэгулявання рынку форэкс у ЕЗ.

Акрамя таго, «Форэкс оптымум» чакае, што пасля адклікання ліцэнзій у найбуйнейшых нябанкавых форэкс-брокераў Расеі "дзейнасць форэкс-кампаній, не афіляваных з банкамі, стане немагчымай на расейскім рынку ўжо ў канцы студзеня 2019 года".

«Наша кампанія не выключае ў сваіх прагнозах магчымасці ўвядзення падобных абмежавальных захадаў і ў Рэспубліцы Беларусь. Пры гэтым "Форэкс оптымум" заўсёды імкнулася да вядзення бізнэсу ў строгай адпаведнасці з дзейным заканадаўствам», - гаворыцца ў паведамленні форэкс-брокера.

Нагадаем, 4 чэрвеня 2015 года Аляксандр Лукашэнка падпісаў указ № 231 аб рэгуляванні рынку «Форэкс». Дакумент быў прыняты для «развіцця фінансавага рынку Беларусі, павышэння прававой абароненасці грамадзян - спажыўцоў фінансавых паслуг і зніжэння рызыкі з'яўлення на рынку кампаній-махляроў і фінансавых пірамід».

- Аб форэкс-кампаніях вельмі ўдалы ўказ у нас выйшаў, намі цікавяцца кампаніі з шмат якіх краін, - казаў намеснік старшыні ўправы Нацбанка Пятро Мамановіч. - Сёння ў нас дзейнічае 10 форэкс-кампаній. Колькасць іх кліентаў - 9235, з іх больш за 60% - нерэзідэнты. Яны ініцыявалі у 2018 годзе 1,4 млн аперацый на суму 16,9 млрд - і 60% з дадатным для кліентаў вынікам.

Мамановіч адзначыў, што кліенты ў Беларусі абароненыя законам, няма відавочных парушэнняў у працы кампаній, усё празрыста і заўсёды можна спраўдзіць, «ці сваволіць кампанія».