Дэмакрат Хуліян Кастра вылучыў сваю кандыдатуру на пасаду прэзідэнта ЗША

Унук эмігранта з Мексікі раней працаваў у адміністрацыі Барака Абамы.

Тэхаскі дэмакрат Хуліян Кастра, былы мэр Сан-Антонія, афіцыйна абвясціў пра свой удзел у выбарах прэзідэнта ЗША ў 2020 годзе, паведамляе «Голас Амерыкі».

44-гадовы Кастра, унук эмігранта з Мексікі, працаваў у адміністрацыі Барака Абамы на пасадзе кіраўніка Міністэрства жыллёвага будаўніцтва і гарадскога развіцця. Яго ўжо даўно называюць адной з «узыходзячых зорак» у Дэмакратычнай партыі. Кастра будзе пазіцыянаваць сябе, як палітычнага аўтсайдэра з рэпутацыяй ліберала.

Адразу пасля абвяшчэння аб вылучэнні кандыдатуры, Кастра адправіцца ў «перадвыбарчы тур» па ЗША. Адным з першых прыпынкаў у панядзелак стане Пуэрта-Рыка. Там Кастра наведае мерапрыемства, якое праводзіць ліберальна настроены Лацінаамерыканскі фонд перамогі.

Палітык абвясціў аб уступленні ў перадвыбарчую гонку ў заходнім прыгарадзе Сан-Антонія, у якім жывуць мексіканцы, якія ў асноўным нарадзіліся ў ЗША.

Кастра падтрымаў праграму «Медзікер для ўсіх», якая прадугледжвае стварэнне ў ЗША сістэмы грамадскай аховы здароўя. Кандыдаты ў прэзідэнты ад дэмакратаў, хутчэй за ўсё, падзеляцца з нагоды гэтага пытання. Акрамя таго, Кастра неаднаразова выказваўся ў падтрымку руху «Чорныя жыцці маюць значэнне» і казаў пра небяспеку змены клімату на планеце.

Кастра стаў другім кандыдатам, які фармальна адкрыў перадвыбарчую кампанію. Былы кангрэсмэн Джон Дэлані абвясціў аб сваім вылучэнні больш за год таму. Сенатарка ад Масачусетса Элізабэт Уорэн сфармавала даследчы камітэт. У пятніцу аб сваім вылучэнні заявіў заканадавец з Палаты прадстаўнікоў Тулсі Габард.

Хуліян Кастра можа стаць першым у гісторыі ЗША прэзідэнтам лацінаамерыканскага паходжання - вядома, у выпадку перамогі на выбарах. Яшчэ ён можа стаць першым у гісторыі краіны прэзідэнтам, у якога ёсць брат-блізнюк. Ягоны брат Хаакін Кастра прадстаўляе Тэхас у Палаце прадстаўнікоў. Ён неаднаразова крытыкаваў дзейнасць прэзідэнта Трампа.