CNN: ЗША пачалі выводзіць з Сірыі наземную вайсковую тэхніку
- 11.01.2019, 11:39
- 5,662
Спосаб транспартавання тэхнікі захоўваецца ў таямніцы.
Апошнія дні ЗША вывелі з Сірыі пэўную наземную вайсковую тэхніку, што сведчыць аб пачатку вываду амерыканскіх войскаў з краіны ў адпаведнасці з загадам прэзідэнта Дональда Трампа.
Пра гэта тэлеканалу CNN паведаміў прадстаўнік адміністрацыі Трампа, непасрэдна знаёмы з ходам аперацыі.
"Некаторыя грузы ўжо перавезены", - сказаў чыноўнік. З меркаванняў бяспекі ён не стаў распавядаць, пра які груз ідзе гаворка, а таксама якім шляхам - паветраным або наземным - ён быў транспартаваны.
Чыноўнік таксама не ўдакладніў, з якой часткі Сірыі было выведзенае вайсковае абсталяванне. Хоць чакаецца, што вывад войскаў пачнецца з паўночнай часткі Сірыі.
Прэзідэнт ЗША Дональд Трамп абвясціў аб вывадзе амерыканскіх войскаў з Сірыі ў снежні. Амерыканскія высокапастаўленыя асобы пакуль не агучвалі графік вываду.
Раней на гэтым тыдні Пентагон заявіў, што праз асцярогу з нагоды бяспекі правядзення аперацый дэталі перамяшчэння войскаў або тэрміны іх вываду агучаныя не будуць. Але Пентагон паабяцаў перыядычна даваць абноўленую інфармацыю аб прагрэсе ў адсотках пра вывезенае з Сірыі абсталяванне.
