Відэафакт: «Лятучы галандзец» на магілёўскай трасе

Аўтамабіль шакаваў іншых кіроўцаў.

На магілёўскай трасе сёння раніцай бачылі «лятучага галандца». Акрамя жартаў: аўтамабіль, які, відавочна, прайшоў праз сур'ёзныя жыццёвыя ўзрушэнні, паволі каціў у бок сталіцы, здаецца, насуперак законам фізікі. «Цяпер я ведаю, што азначае выраз «ездзіць бокам» ці «даць кута», - напісаў чытач onliner.by з нікам AlexNedved.

Пра ўбачанае на трасе М4 (Менск - Магілёў) журналістам распавёў чытач Іван. Ён ехаў у напрамку Менска, праехаў Беразіно.

- Мне спачатку падалося, што наперадзе аварыя: я бачыў пабіты аўтамабіль. Толькі я нібыта еду, а аўтамабіль гэты чамусьці не набліжаецца, - сказаў Іван.

Неўзабаве ён параўняўся з тым, каго даганяў. Volkswagen нагадваў аўтамабіль-прывід.

- Вельмі падобна, што аўто пабывала ў сур'ёзнай аварыі. Хоць наступстваў на трасе я не бачыў. Хацеў спыніцца, дапамагчы. Але кіроўца Volkswagen, малады хлопец гадоў 20-25, бойка працягваў рух. Я крыху збянтэжыўся і не мог стрымаць смех, - адзначыў чытач.

Замест задняга левага кола на аўто стаяла запаска. Праз задняе шкло быў бачны знак аварыйнага прыпынку.

- Я так і не зразумеў механіку, але машына, у якой усе колы былі выкручаны ў напрамку абочыны, чамусьці ехала па прамой. Хуткасць была дзесьці 20-30 км/г. Не ўяўляю, адкуль узялася гэтая машына і куды ехала. Можа быць, на ТА? - выказаў меркаванне аўтар відэа.

Безумоўна, як і сказана ў ПДР (п. 9.3), кіроўца абавязаны ўтрымліваць транспартны сродак, які ўдзельнічае ў дарожным руху, у тэхнічна спраўным стане, правяраць яго тэхнічны стан перад пачаткам руху, а таксама трымаць у чысціні яго шкло і знешнія светлавыя прыборы. Вось толькі ці ведае пра гэта капітан «лятучага галандца»?

Як стала вядома, «лятучы галандзец» даехаў да Менска. Відэа з ім даслаў чытач Максім Васільеў. Ён бачыў Volkswagen сёння на праспекце Жукава.