29 сакавiка 2024, Пятніца, 0:47
Падтрымайце
сайт
Сім сім,
Хартыя 97!
Рубрыкі

Галоўны трэнер БАТЭ: У Лізе Еўропы хочам прабіцца ў накаўт-раўнд

Галоўны трэнер БАТЭ: У Лізе Еўропы хочам прабіцца ў накаўт-раўнд
ФОТА: FCBATE.BY

Аляксей Бага агучыў задачы барысаўчан у Лізе Еўропы.

Напярэдадні матчу 1-га тура групавога раўнду Лігі Еўропы паміж вугорскім «Відзі» і БАТЭ адбылася афіцыйная прэс-канферэнцыя галоўнага трэнера Аляксея Багі. Трэнер яшчэ раз паўтарыў пра задачу каманды на турнір, пахваліў спаборніка і распавёў пра значэнне досведу сваёй каманды. Яго словы паведамляе афіцыйны сайт БАТЭ.

- Напэўна пры падрыхтоўцы да паядынку вы праглядалі відэазапісы гульняў «Відзі» ў кваліфікацыйных стадыях Лігі чэмпіёнаў. У Вугоршчыне ўважаюць, што клуб з Секешфехервара дзейнічаў вельмі арганізавана і дысцыплінавана. А якое ўражанне засталося ў вас?

- Мы вывучылі шмат рознай інфармацыі пра вугорскага чэмпіёна, прагледзелі нямала відэаматэрыялаў. Ужо тое, што «Відзі» прайшоў вельмі сур'ёзных спаборнікаў, сярод якіх балгарскі «Лудагорац», выклікае павагу. Гэта моцная каманда, збалансаваная ва ўсіх лініях. У складзе ёсць дасведчаныя футбалісты, сярод якіх шмат зборнікаў. Не сумняваюся, заўтрашняя гульня будзе для нас цяжкай, але разам з тым і цікавай.

- Летась у групавым этапе Ліга Еўропы БАТЭ набрала 5 балаў. Колькі спадзяецеся ўзяць у цяперашнім? І тое, што пачынаеце ў Вугоршчыне, лічыце добрым момантам, каб выканаць сваю задачу?

- Хочам набраць столькі балаў, колькі дазваляе нам прабіцца ў накаўт-раўнд. А будзе гэта пяць, тры ці два з паловай, не мае значэння. Тое, што стартуем у Будапешце, - так склаўся каляндар. Нічога страшнага або незвычайнага ў тым не бачым. У нас вельмі дасведчаная каманда, якая шмат што бачыла на сваім веку. Выпала пачынаць у Будапешце, значыць, так таму і быць. Цудоўны горад, цудоўны стадыён. Ніякіх праблем.

- Задаў такое пытанне з тае прычыны, што, магчыма, вы любіце пачынаць на чужых палях. Мы бачылі, што ў кваліфікацыйных стадыях Лігі чэмпіёнаў БАТЭ адолеў ХІК і «Карабах» як раз у гасцях.

- У Фінляндыі мы гулялі матч у адказ, а супрацьстаянне з ХІКам пачыналі ў Барысаве. Але тое, што набіраем балы на выездзе, сведчыць пра наш клас, сілу і досвед.

- Вы згадалі пра досвед БАТЭ. Наколькі гэты досвед важны? Менавіта досвед групавых этапаў. Бо «Відзі» таксама мае досвед, але, праўда, у кваліфікацыйных матчах. А ваша каманда апошнім часам часта выступала ў групавых этапах Лігі чэмпіёнаў і Лігі Еўропы. Думаеце, гэты досвед адаб'ецца?

- Упэўнены на сто адсоткаў. Досвед матчаў кваліфікацыйных стадый і досвед удзелу ў групавых турнірах - розныя рэчы. Калі гуляеш у групавых турнірах супраць вялікіх клубаў, прычым на арэнах сусветнага ўзроўню, гэта загартоўвае футбалістаў, дазваляе хутчэй вучыцца, дадае ўпэўненасці. Перакананы, досвед дапаможа нам заўтра.

У Вугоршчыну прыляцелі 20 гульцоў БАТЭ, сярод якіх ёсць цемнаскурыя пачаткоўцы клуба і Міхаіл Гардзяйчук, але няма Аляксандра Глеба і Мікалая Сігневіча.

Нагадаем, што гульня супраць «Відзі» пройдзе 20 верасня і пачнецца а 19.00.

Напісаць каментар

Таксама сачыце за акаўнтамі Charter97.org у сацыяльных сетках