Дырэктар «Дынама» распавёў, што здарылася з крэсламі на стадыёне

Як заўсёды атрымліваецца, што нехта недзе недарабіў.

На днях фатограф Арцём Прадко выклаў фота трыбуны новага стадыёна «Дынама». Некаторыя сядзенні ўжо зламаныя.

Дырэктар стадыёна «Дынама» Васіль Аляксеенка распавядае, што крэслы на стадыёне мацуюцца па пяць штук на адну металічную паласу. Яна, у сваю чаргу, мацуецца да іншага металічнага элементу, падлучанага да бетону, перадае ягоныя словы tut.by.

- І там, дзе ўнізе паласа мацавалася метал да металу, лопнула зварачнае шво. Ён быў зроблены няякасна, і канструкцыя з'ехала. Такіх месцаў было блізу двух-трох, і мы неўзабаве перасадзілі людзей на рэзервовыя месцы. Самі крэслы вельмі трывалыя, і яны не паламаліся.

Паводле слоў Аляксеенкі, крэслы вырабляла і пастаўляла прадпрыемства гомельскага таварыства інвалідаў. І спецыялісты з Гомеля за выходныя ліквідавалі недахопы і праверылі астатнія мацаванні.

- Як заўсёды атрымліваецца, што нехта недзе недарабіў. Непрыемна, вядома, але праблема была ліквідаваная адразу. Цяпер можна быць упэўненым, што ў перспектыве такіх момантаў не здарыцца, калі не будзе форс-мажора.