КДБ затрымаў галоўнага лекара Гарадзенскай вобласці

Чуткі пра затрыманне Андрэя Стрыжака з'явіліся на мінулым тыдні.

Начальнік управы аховы здароўя Гарадзенскага аблвыканкама затрыманы супрацоўнікамі КДБ. Пра гэта журналістам «ВГ» распавялі ў прэс-службе ўстановы.

Чуткі пра затрыманне Андрэя Стрыжака з'явіліся на мінулым тыдні. Журналісты паспрабавалі спраўдзіць гэтую інфармацыю, аднак у Следчым камітэце распавялі, што паводле распачынання крымінальных спраў ён не затрымліваўся. У Камітэце дзяржбяспекі адказалі, што не валодаюць звесткамі аб затрыманні. Ва ўправе аховы здароўя ў чацвер раніцай адказалі, што начальнік знаходзіцца ў адпачынку. На пытанне, калі, нам адказалі, што «не ведаюць, трэба падымаць дакументы».

Толькі ў панядзелак афіцыйны прадстаўнік КДБ РБ Андрэй Яраш пацвердзіў, што Стрыжак на самай справе затрыманы. Пры гэтым у КДБ не ўдакладнілі, з якога чысла чыноўнік знаходзіцца пад вартай і ў чым падазраецца.

Андрэй Стрыжак нарадзіўся 5 кастрычніка 1963 года ў Гародні. У 1986 годзе скончыў ГрДМУ, у 2007 годзе - Акадэмію кіравання пры Прэзідэнце РБ. Быў тэрапеўтам, выконваючым абавязкі галоўнага лекара Далговіцкай сельскай участковай лякарні Магілёўскай вобласці, хірургам дзіцячай паліклінікі №1 г. Гародні, лекарам дзіцячага артапедатраўматалагічнага аддзялення лякарні №4, лекарам-траўматолагам, намеснікам галоўнага лекара лякарні, затым аб'яднання «Хуткая медыцынская дапамога» г. Гародні. З 2003 года - галоўны лекар Гарадзенскай абласной дзіцячай клінічнай лякарні. Начальнікам управы аховы здароўя Гарадзенскага аблвыканкама прызначаны ў снежні 2010 года.