Washington Post распавяла пра беларускія карані вядомага бейсбаліста

Сям'я Алекса Брэгмана прыбыла ў Балтымар з Пінска ў 1911 годзе.

Прадзядуля Алекса Брэгмана, аднаго з гульцоў бейсбольнага клуба «Х'юстан Астрас», прыехаў у ЗША з Беларусі. Аб гэтым піша газета Washington Post, паведамляе «Беларусь и мир».

Сям'я Бо Брэгмана прыбыла ў Балтымар з Пінска ў 1911 годзе. Тады продку цяперашняй зоркі аднаго з самых папулярных у Амерыцы тыпаў спорту было 4 гады.

Пасталеўшы, ён жыў у Вашынгтоне і стаў вядомы ў спартовых колах як букмекер, заўзятар іпадрома і баксёрскі агент, які працаваў, напрыклад, з Джо Льюісам і Білі Конам.

Бо таксама валодаў невялікай доляй «Вашынгтон Рэдскінз» - клуба амерыканскага футбола.

А вечарамі і ў выходныя ён ператвараўся ў маленькага, але задзірлівага гульца ў той ці іншай аматарскай бейсбольнай камандзе, самай вядомай з якіх была «Вашынгтон Ацтэкс».

Сын Бо - Стэн - вывучаў юрыспрудэнцыю ва Універсітэце Джорджа Вашынгтона і працаваў на выбарчыя кампаніі для Эдлая Стывенсана, Губерта Хамфры і Ліндана Джонсана.

Затым Стэн быў галоўным юрысконсультам бейсбольнага клуба «Вашынгтон Сенатарз». Ён пераканаў бізнэсоўца Боба Шорта набыць гэтую каманду, а затым наняць трэнерам Тэда Вільямса.

У сваю чаргу, адзін з сыноў Стэна - Сэм - гуляў у бейсбол спачатку за школьную каманду ў горадзе Бетэсдзе, штат Мэрыленд, а затым за Універсітэт Нью-Мексіка.

Пазней ён стаў выбітным адвакатам у Альбукерку, штат Нью-Мексіка, і атрымаў пасаду старшыні Дэмакратычнай партыі штата.

А 30 сакавіка 1994 года ў сям'і Сэма і ягонай жонкі Джэкі Брэгман з'явіўся на свет першы сын, якога назвалі Аляксандэрам. Ён і з'яўляецца сёння гульцом «Х'юстан Астрас».