Лукашэнка і Румас наступаюць на старыя граблі
11- 11.10.2018, 8:59
- 19,844
Што можа падкасіць беларускую эканоміку.
Беларуская эканоміка будзе стагнаваць, а прыбыткі беларусаў - усё больш адставаць ад дабрабыту заходніх суседзяў, піша zautra.by.
Рывок немагчымы
Выйсці на двухадсоткавы рост ВУП у наступным годзе наўрад ці ўдасца, бо ўлады не змогуць прыдумаць, як выцягнуць дзяржпрадпрыемствы з пазыковай ямы.
- Міністэрства эканомікі бачыць, што калі падзеі будуць ісці натуральным ходам, у нас няма перспектыў для нейкага рыўка. Мы будзем расці павольна. І калі ўлічыць, што ў большасці краін Еўропы ў Польшчы, Чэхіі, краінах Балтыі тэмпы росту вышэйшыя, будзе расці разрыў паміж узроўнем даходаў у нашай краіне і ў суседзяў, - адзначае экспэрт Даследчага цэнтра ІПМ Антон Даўгавечны.
Дзяржсектар – слабае звяно
У процівагу планам урада выступяць рызыкі і праблемы. Сярод іх рост пратэкцыянізму, запасяцца фінансавыя праблемы ў рэальным сектары, пэўнае павелічэнне інфляцыі, фарсаванае напампоўванне заробкаў, спробы стымулявання эканомікі за кошт ільготнага крэдытавання, складаная і незразумелая сітуацыя з праблемнымі сельгаспрадпрыемствамі. Ударыць па эканоміцы могуць і шматлікія вонкавыя змены.
Са слоў экспэрта, нядаўна прынятыя ўрадам пастановы аб рэфінансаванні крэдытаў сельгаспрадпрыемстваў пад 1,5% фактычна вяртаюць эканоміку да сумнай практыкі.
Калі розніцу паміж льготнай адсоткавай стаўкай аграрыям і рынкавай абавяжуць кампенсаваць банкі, то ўзнікне пытанне дырэктыўнага крэдытавання, супраць якога выступаюць і Міжнародны валютны фонд, і Еўразійскі фонд стабілізацыі і развіцця. Калі ж рабіць гэта будуць наўпрост з бюджэту, то могуць узнікнуць праблемы з пазначанымі на найбліжэйшыя некалькі гадоў сур'ёзнымі планамі выплаты замежнай пазыкі. Стымулюючы заробкі і спажыванне, улады таксама рызыкуюць страціць кантроль над сітуацыяй.
- Мы ведаем, чым раней заканчваліся ініцыятывы нарошчвання даходаў насельніцтва. Таму няма гарантыі, што задача іх павелічэння скончыцца чымсьці іншым. Пакуль льготнае крэдытаванне не пашыраецца - і гэта добра. Але рызыкі вярнуцца да старой мадэлі пакуль застаюцца, - адзначае Антон Даўгавечны.
Галоўнымі выклікамі для эканомікі стануць падатковы манеўр Расеі праз зніжэнне «нафтавых» даходаў у бюджэт Беларусі, а таксама ўзрослыя і невыплачаныя праблемныя пазыкі дзяржпрадпрыемстваў.
Антон Даўгавечны нагадвае, што ў пачатку гэтага года адбыўся значны скачок запазычанасці дзяржпрадпрыемстваў. На думку экспэрта, менавіта ад таго, як будуць развязвацца фінансавыя праблемы дзяржсектара, шмат у чым залежыць: ці атрымаецца ўраду дасягнуць вызначанага росту эканомікі.