«Хлопцы, мы вас падтрымліваем»

Гісторыя з Курапацкай варты.

Учора стаім на варце, пад'яжджае да "Бульбашхолу" мэрс, поўны людзей. Зьнешнасьці трохі такой усходняй, думаю, татары, ці хто. Немалады мужчына за рулём кажа па-беларуску:

-Хлопцы, мы вас падтрымліваем. Есьці там ня будзем, у нас сустрэча.

-Дзякуй за добрыя словы, - кажу. - Так а чаго вы там сустракаецеся, калі нас падтрымліваеце?

-А што там такое? - пытае хтосьці з машыны.

-Расстрэльвалі людзей, крыжы вунь стаяць, бачыш? Тут помнік трэба, а яны кабак паставілі, - адказвае кіроўца. - Добра, мы заедзем, скажам ім і назад.

Мерс заяжджае на тэрыторыю, выходзяць людзі, заходзяць у рэстарацыю. Праз хвіліну выходзяць, сядаюць у машыну і выяжджаюць. Спыняюцца ля нас.

-Мы тут ня будзем, хлопцы. Мы ім сказалі. Мы самі цыгане, вас падтрымліваем, усё правільна вы робіце.

Уласьнік учора быў там.

Відавочна, Зайдэс мацае ўсе этнічныя і сацыяльныя групы, якія маглі б стаць кліентамі "Бульбашхола". Праводзіць у пустой рэстарацыі дні Грузіі, Польшчы, Украіны, габрэйскай кухні. Запрашае кітайцаў, казахаў, латышоў. Раздае бясплатны плоў. Цягне туды "браткоў", прасталытак, чыноўнікаў, шавіністаў, унукаў нквдзістаў.

А "Бульбашхол" стаіць пусты.

І вось беларускія цыгане парадавалі.

Павел Севярынец, «Фэйсбук»