У Іркуцкай вобласці РФ праз пажары эвакуююць горад

Полымя падыходзіць да яшчэ аднаго горада.

Каля горада Віхароўка ў Брацкім раёне Іркуцкай вобласці пачаўся буйны пажар. З паведамленняў мясцовых жыхароў, гарыць стэп вакол горада. Таксама стэпавы пажар заўважаны каля гары Маргудон, паведамляе «Радыё Свабода».

«Усё гарыць на лецішчах, неба ўсё ў дыме, не відаць сонца - такі дым. Я не магу ацаніць, наколькі блізка да хат агонь ужо падышоў, але трасу да нас трэба ўжо перакрываць. Знаёмы даслаў фота - гарыць ужо дарога, ледзь праскочылі. Да нас агонь ідзе з боку Турмы (пасёлак у Брацкім раёне, 22 км ад Віхароўкі)», - распавёў рэдакцыі жыхар лецішчаў пад Віхароўкай. У пабліку «Першы ў Брацку» карыстальнікі публікуюць фатаграфіі падпаленай дарогі на лецішчы ў Віхароўцы.

Мэр Брацкага раёна Аляксандр Дубровін заявіў, што ў Віхароўцы арганізавана эвакуацыя жыхароў з-за складанага пажару. «Пажар верхавы - самы складаны ў тушэнні і самы небяспечны. Агонь нічога не пакідае на сваім шляху. Пачалася эвакуацыя агароднікаў, для іх падрыхтаваны аўтобус, многія выязджаюць на сваіх аўтамабілях», - напісаў ён у сваім канале і папрасіў людзей не адмаўляцца ад прапановы з'ехаць у бяспечныя раёны.

Акрамя таго, у Правабярэжным раёне Брацка загарэўся склад драўніны. Таксама паведамляецца, што агонь ужо перакінуўся на вытворчыя аб'екты, гаражы і аўтамабілі, паведамляе канал «Братчане». Мясцовыя жыхары гавораць, што агонь ушчыльную падышоў да 45-га квартала - раёна шматпавярховай забудовы ў Гідрабудаўніку. Цэнтр Брацка зацягвае дымам ад пажараў вакол горада.

Паводле звестак МНС, у Брацкім раёне загарэліся адразу пяць садовых таварыстваў і абвясцілі аб надзвычайнай пажаранебяспецы на 7-8 траўня з-за моцнага ветру.