Байдэн адобрыў перадачу Украіне вайсковай дапамогі на $400 мільёнаў

Украіне будзе перададзеная зброя са складоў войска ЗША.

Прэзідэнт ЗША Джо Байдэн 10 траўня падпісаў указ аб выдзяленні Украіне вайсковай дапамогі коштам да 400 мільёнаў даляраў. Пра гэта, як піша «Еўрапейская праўда», гаворыцца ў паведамленні Белага дома.

Сваім указам Байдэн дэлегуе дзяржаўнаму сакратару ЗША паўнамоцтвы на скарачэнне «абаронных тавараў і паслуг Міністэрства абароны, а таксама вайсковай адукацыі і падрыхтоўкі з мэтай надання дапамогі Украіне» на суму да 400 мільёнаў даляраў.

Размова ідзе аб выдзяленні зброі са складоў войска ЗША, але яе пералік пакуль не быў абнародаваны.

Паводле інфармацыі выдання Politico, пакет змяшчае дадатковыя ракеты да сістэм Patriot, зенітныя ракеты Stinger, баявыя машыны Bradley, машыны з абаронай ад мін і засад (MRAP), супрацьтанкавыя комплексы Javelin і іншыя боепрыпасы.

Нагадаем, прэзідэнт ЗША Джо Байдэн 24 красавіка падпісаў прыняты Кангрэсам пакет заканадаўства з амаль 61 мільярдам даляраў дапамогі Украіне і іншым хаўруснікам ЗША. Адразу пасля гэтага ЗША абвясцілі аб пакеце вайсковай дапамогі Украіне коштам 1 мільярд даляраў.

Пасля гэтага ў Дзярждэпе пацвярджалі падрыхтоўку далейшых пакетаў вайсковай дапамогі.