Джокавіч стаў самай узроставай першай ракеткай свету ў гісторыі
4- 7.04.2024, 15:11
- 3,770
Сербскі тэнісіст перасягнуў дасягненне швэйцарца Роджэра Федэрэра.
Серб Новак Джокавіч стаў самым узроставым іграком на першым радку рэйтынгу Асацыяцыі тэнісістаў-прафесіяналаў (ATP) у гісторыі, перасягнуўшы на дзень рэкорд швэйцарца Роджэра Федэрэра.
Федэрэр апошні раз быў першай ракеткай свету ва ўзросце 36 гадоў і 320 дзён у 2018 годзе. Джокавічу ў нядзелю, калі ён усё яшчэ ўзначальвае рэйтынг, 36 гадоў і 321 дзень.
У панядзелак серб пачне ўжо 420-ты тыдзень у статусе першай ракеткі свету.
Федэрэр быў на чале рэйтынгу 310 тыдняў, ён скончыў кар'еру ў 2022-м.
Упершыню Джокавіч стаў першай ракеткай 4 ліпеня 2011 года ва ўзросце 24 гадоў.
Усяго на рахунку серба 98 тытулаў, з іх пасля дасягнення 30-годдзя ён перамог у 31, у тым ліку атрымаў 12 трафеяў «Вялікага шалома», дзесяць турніраў «Мастэрс» і два Выніковыя турніры ATP.
У гэтым сезоне Джокавіч згуляў на трох турнірах, яго найлепшым вынікам быў паўфінал Australian Open.