Экс-афіцэр бундэсвэра прызнаўся ў шпіянажы на Расею

У перадачы вайсковай інфармацыі.

Былы афіцэр бундэсвэра Томас Х. прызнаўся, што ажыццяўляў шпіёнскую дзейнасць на карысць Расеі, перадаючы ёй вайсковую інфармацыю. Падчас дачы паказанняў у вышэйшым зямельным судзе ў Дзюсельдорфе ў панядзелак, 29 красавіка, 54-гадовы мужчына заявіў, што ім рухаў страх перад ядзернай эскалацыяй вайны ва Украіне, паведамляе DW.

Са слоў падсуднага, якога цытуе агенцтва dpa, прыкладна тады ж ён звязаўся з партыяй «Альтэрнатыва для Германіі» (АдГ) і падаў заяўку на ўступленне ў яе. Яго заяўка была ўхваленая ў ліпені 2023 года, сведчаць звесткі суда. Абвінавачаны расказаў таксама, што раней уступаў у кантакт з Левай партыяй, але яго адштурхоўвала прынцыповае непрыманне гэтай партыяй бундэсвэра.

Звярнуцца ў расейскае консульства Томаса Х. заахвоціла паведамленне, апублікаванае «меркавана ў TikTok», сказаў ён, прызнаўшыся, што ў той час быў падпісаны ў сацсетцы на прарасейскага інфлюэнсера, блізкага да АдГ. Пра якія менавіта паведамленні ішла размова, ён не змог успомніць.

Падсудны заявіў, што для яго важна было своечасова даставіць сям'ю ў бяспечнае месца. Каб даведацца, «калі гэта адбудзецца», ён звярнуўся па дапамогу да расейскага боку. «Я бачыў толькі гэты шлях», - прызнаўся Томас Х., адзначыўшы, што вельмі шкадуе аб сваёй пастанове і ўважае яе за памылку. Аднак у той перыяд, з яго слоў, ён быў у вельмі дрэнным псіхічным стане.

Разгляд справы Томаса Х., затрыманага летам 2023 года, і які знаходзіцца пад вартай паводле абвінавачання ў шпіянажы на карысць Расеі, пачаўся ў вышэйшым зямельным судзе ў Дзюсельдорфе ў панядзелак. Судовыя слуханні працягнуцца да 24 чэрвеня.

Федэральная пракуратура Нямеччыны выставіла былому вайскоўцу абвінавачанні ў адным эпізодзе перадачы расейскай сакрэтнай службе інфармацыі, якую ён атрымаў падчас працы ў Федэральным ведамстве ўзбраенняў, інфармацыйных тэхналогій і выкарыстання бундэсвэра, размешчаным у Кобленцы.

Паводле звестак пракуратуры, з траўня 2023 года Томас Х. на ўласную ініцыятыву звяртаўся ў генеральнае консульства РФ у Боне і расейскае пасольства ў Берліне і прапаноўваў ім супрацоўніцтва, а затым выдаў службовую інфармацыю для яе наступнай перадачы адной з расейскіх спецслужбаў. У следства няма звестак, што ён атрымаў за гэта грошы.

Падрабязнасці аб тым, якую менавіта інфармацыю ён мог перадаць, не выдаюцца. Паведамлялася, што Томас Х. з'яўляецца афіцэрам бундэсвэра ў званні гаўптмана (адпавядае званню капітана ў расейскім войску) і быў вядомы сваёй сімпатыяй да АдГ, а таксама яе палітыкі ў дачыненні да Расеі.

Томас Х. служыў у ведамстве, якое адказвае за закупы зброі для бундэсвэра.

Ведамства, у якім працаваў абвінавачаны, штогод падпісвае абаронныя кантракты на мільярды еўраў, закупляючы неабходнае абсталяванне для ўзброеных сіл Нямеччыны. Пасля пачатку расейскага ўварвання ва Украіну і прынятых на гэтым фоне захадаў па мадэрнізацыі бундэсвэра задачы ведамства, якое налічвае блізу 12 тысяч супрацоўнікаў, сталі яшчэ больш значнымі, адзначае агенцтва AFP.

Расследаванне ў дачыненні да Томаса Х. праводзілася ў цесным узаемадзеянні са Службай вайсковай контрвыведкі (MAD) і Федэральным ведамствам у ахове канстытуцыі, якое ў ФРГ выконвае функцыі органаў дзяржаўнай бяспекі. Пасля арышту экс-афіцэра міністр унутраных спраў Нямеччыны Нэнсі Фезер абвясціла аб узмацненні жорсткасці праверак у дзяржустановах, а Саюз вайскоўцаў бундэсвэра заклікаў жаўнераў да пільнасці.